Grupi i “vulës” i kryesuar nga Lulzim Basha ka kërkuar interpelancë urgjente me kryeministrin Edi Rama lidhur me marrëveshjen e firmosur me kryeministren italiane ku Shqipëria bëhet vend pritës për emigrantët e paligjshëm.
Marrëveshja mes Ramës dhe Melonisë për menaxhimin e emigracionit të paligjshëm ka shkaktuar debat dhe është kundërshtuar ashpër nga opozita shqiptare e cila thekson se kjo mund të cënojë sigurinë kombëtare.
Kryeministri Edi Rama ishte këtë të hënë në Itali ku mbajti një konferencë për shtyp së bashku me homologen e tij italiane Girogia Meloni për të folur rreth marrëveshjes për refugjatët.
Rama tha se Shqipëria nuk mund të jetë zgjidhja për situatën e vështirë ku ndodhet Italia në këto momente, por mund të japë një ndihmë, pasi pas futjes në Itali, sipas tij emigrantët e paligjshëm e kanë shumë të lehtë të lëvizin në çdo vend të BE-së.
Rama tha se Shqipëria i është në borxh të madh Italisë për pritjen e refugjatëve në vitet ’90, ndaj nëse ajo thërret, Shqipëria duhet të përgjigjet.
Në një konferencë për mediat pas takimit, Meloni ka dhënë lajmin se në Shëngjin do hapet një qendër pritjeje për refugjatët.
Meloni shtoi se refugjatët që kërkojnë azil do të rrinë në këto zona deri sa të seleksionohen, nëse duhet pranuar apo jo kërkesa, ndërsa sipas saj, fluksi mund të arrijë në 36 mijë persona.
