Drejtoria e Përgjithshme e Shërbimeve të Transportit Rrugor (DPSHTRR) deklaron se flota e automjeteve që qarkullojnë në Shqipëri është rinuar me 6 vite.
Kjo deklaratë vjen pas raportit të Kontrollit të Lartë të Shtetit (KLSH) ku tregon se mosha mesatare e mjeteve që qarkullojnë në vend ka ardhur në rritje.
Raporti i KLSH-së vlerëson se masat e marra nga institucionet përgjegjëse nuk kanë qenë plotësisht të mjaftueshme për të përmirësuar sektorin e transportit rrugor dhe për rrjedhojë cilësinë e ajrit.
“Angazhimet e institucioneve përgjegjëse duhet të orientohen drejt rinovimit të flotës së mjeteve rrugore, vënies në zbatim të stimujve financiare me qëllim shtimin e numrit të mjeteve rrugor ekologjike, plotësimit të kuadrit ligjor e rregullator në përputhje me praktikat më të mira ndërkombëtare si dhe forcimin e mëtejshëm të sistemit të monitorimit të cilësisë së ajrit.
Më konkretisht ka rezultuar se flota e mjeteve të transportit rrugor nuk ka pësuar ndryshime pozitive në drejtim të uljes së moshës mesatare të mjeteve rrugore si dhe të përdorimit të karburanteve me ndikim të ulët në cilësinë e ajrit”, nënvizon KLSH.
Po kështu thuhet se qeveria shqiptare, nuk ka transpozuar një sërë direktivash të BE-së të rëndësishme për nxitjen dhe përdorimin e mjeteve me karburant alternativ.
Gjithashtu në dokumentet e saj strategjike të miratuara, ajo nuk ka specifikuar objektiva, aktivitete dhe targete të matshme e të arritshme. Ndaj dhe vlerësimi për arritjen apo jo të masave ajo ka parashikuar mbetet subjektiv dhe i pa mundur.
Ndryshe nga raporti i KLSH, DPSHTRR me në krye Blendi Gonxhen pretendon se “Viti i prodhimit mesatar i flotës së mjeteve në vitin 2015 ishte viti 1998, ndërkohë që në vitin 2022 ishte viti 2004, me një rinim prej 6 vitesh”. DPSHTRR thekson se “Ndikimi i mjeteve të transportit rrugor në cilësinë e ajrit”, i cili edhe pse ka patur objeksionin e argumentuar dhe zyrtar nga DPSHTRR, ka dalë, i pasaktë.
