Kreu i PD-së, Sali Berisha ka deklaruar se në mbledhjen e grupit parlamentar kanë diskutuar se si t’i përgjigjen dhëmb për dhëmb përpjekjeve të kryeministrit Edi Rama për vazhdimin e mohimit të të drejtave të deputetëve
Në një prononcim për gazetarët, Berisha u ka bërë thirrje deputetëve të PS që të “mos i provokojnë” teksa opozita proteston në Kuvend. Ai tha se Rama po mbyll Kuvendit, pasi sipas tij, seanca e ardhshme plenare pas 2 nëntorit është lënë pas 20 ditësh, më 22 nëntor.
“Diskutuam si t’i përgjigjemi dhëmb për dhëmb përpjekjeve të Ramës për vazhdimin e mohimit të të drejtave të deputetëve në Kuvend. Dënoj çdo provokim që bëhet në kohën që ne jemi në protestë në Kuvend, u kërkoj deputetëve të PS në Kuvend që të mos marrin rolin e provokatorit. Respektoni protestën. Mos ndodhë si dje, që ne protestonim dhe ata zhurmonin. Dje nuk pati dhunë se unë isha aty, nuk e goditi. Asgjë sekret nuk do jetë. Rama ka zgjedhur taktikë të mbyllë parlamentin. Do ketë seancë me datën 2 dhe seancën tjetër e kanë caktuar me datën 22. Si parlamentarë jemi të betuar. Dhunën e filloi ai tjetri.” – tha Berisha.
Sipas kreut të PD-së, dhunën ditën e djeshme në Kuvend e nisi deputeti socialist Vullnet Sinaj.
“Jo me dhunë. Dhunën e filloi ai tjetri, i cili për të thyer protestën tonë, iu nënshtrua kryetares, çfarë kryetare, se nuk është kryetare ajo, të parlamentit, që e mbushi me gardistë parlamentin dhe kërkonte tu kundërvihej protestës tonë, duke ja dhënë fjalën këtij dhe ati. Z. Sina nuk mund të merrte fjalën, në një kohë kur e tërë opozita ishte në protestë. Të tjera u ekzagjeruan nga mediat, sepse unë kam qenë aty, dhe ai nuk u godit. Ti marrim me radhë pak, ai nuk u godit. Pati përplasje fizike se ai u sul drejt tij, ky jo vetëm që e shkeli njëherë, moralisht e ligjërisht. Ne në protestë, ky mori fjalën për të prishur protestën. Ky nuk është polic aty, por deputet dhe nuk mund të prishë protestën.
Çfarë duhet të bëjnë deputetët e mazhorancës përballë bllokimit të njëpasnjëshëm?
Ne pse po e bllokojmë. Deputetët e mazhorancës duhet të vendosin të respektojnë të drejtat e opozitës në parlament, nëse duan që parlamenti të funksionojë. Kaq e thjeshtë është.” tha Berisha.
Përjashtimin e 7 deputetëve nga Kuvendi, lideri demokrat e komenton: “Vendim i urdhëruar nga Rama, do marrë përgjigje çdo vendim i tyre që nuk përfill protestën e drejtë të deputetëve. Ju ftoj të jeni aty në 15:30.”.
