Ditën e sotme, e hënë 30 tetor, deputetët rikthehen në orën 17:00 në seancë plenare, pas asaj të fundit që nuk u zhvillua për shkak se opozita bllokoi ulëset e ministrave dhe deputetëve të mazhorancës. Ky vendim u mor nga opozita, pasi mazhoranca rrëzoi kërkesat e tyre për ngritjen e komisioneve hetimore për koncesionet në Shëndetësi dhe ndërhyrjen në sistemin TIMS, si dhe rrëzimi i kërkesës për të ndrushuar anëtarët e Komisionit të Reformës Zgjedhore.
Pas shtyrjes së seancës, mazhoranca mori vendimin për t’i përjashtuar me 10 ditë nga aktivitetet parlamentare 23 deputetë të Partisë Demokratike, duke përfshirë dhe kreun e PD-së, Sali Berisha si dhe kreun e grupit parlamentar Gazment Bardhi. Për këtë fakt është njoftuar edhe është vënë në gadishmëri edhe Garda e Republikës, si institucioni përgjegjës për sigurinë e ligjvënësve shqiptarë në sallën e Kuvendit.
Por, ligjvënësit demokratë kanë deklaruar se administrata e Kuvendit i ka bërë llogaritë gabim, pasi sipas tyre vendimi është marrë me datë 19 tetor. Pra, thonë ata, nga data 19 deri më datën 29, një ditë para seancës janë 11 ditë, çka do të thotë që 10 ditë përjashtim mbyllen me datën 28. Por edhë nëse numërimi i ditëve të përjashtimit nis një ditë pas vendimit, pra me datën 20, atëherë deputetëve u mbaron dënimi 10 ditor mesnatën e datës 29.”
Pavarësisht përjashtimeve, grupi parlamentar i Partisë Demokratike ka vendosur që të gjithë deputetët të jenë të pranishëm dhe të mblidhen para ndërtesës së Parlamentit në orën 16:30 minuta për të shkuar siç thuhet në njoftim “në grup në seancë”.
“Nesër (sot) e hënë, ora 17:00, është planifikuar seanca e radhës plenare. Pavarësisht vendimit të përjashtimit arbitrar, i cili parashikon përjashtimin tonë për 11 ditë, ne duhet të jemi të gjithë në seancë. Për këtë qëllim, mblidhemi të gjithë bashkë në orën 16:30 për të shkuar në grup në seancë. Ndërkohë, mbledhja e radhës e grupit do të zhvillohet si zakonisht, të martën, datë 31 Tetor, ora 13:00. Ju përshëndes!”, – shkruhet në mesazhin e Bardhit drejtuar deputetëve të PD-së.
Nëse arrijnë të futen në Kuvend, sot do të jetë dhe përballja e parë e ish-kryeministrit Sali Berisha pas masave të marrave nga SPAK për çështjen e ish-kompleksit “Partizani”, të cilat ai e ka komnsideruar si vendim politik të dirigjuar nga kryeministri Edi Rama.
Seanca e sotme do t’u kushtohet problemeve të qytetarëve.
