Sali Berisha e quajti grabitës pronash dhe mashtrues botuesin Karlo Bolino, në një prononcim për gazetarët jashtë Kuvendit, pas mbylljes së seancës plenare të kësaj të hëne.
Kryetari i PD-së u pyet nga gazetarja e televizionit të drejtuar nga Bolino se po përdor parlamentin për të mbrojtur Kushtetutën apo për betejën me drejtësinë. Duke iu referuar pjesës së dytë të pyetjes, Berisha tha se ky është versioni që propagandohet nga Karlo Bolino.
“Kështu po thotë Karlo Bolino ose ndonjë tjetër i cili ka vjedhur tokën, i cili mashtron. Këto janë tezat e Bolions që i merr nga Edi Rama. Unë e kam përdorur gjithnjë tribunë të qytetarisë. Ai ka rrëmbyer 5 mijë metër katrorë tokë të pronarëve për të ndërtuar me Edi Ramën, pallatin. Po mbrojmë kushtetutën që është jetike për çdo qytetar shqiptar“, tha Berisha.
“Pa mbrojtjen e kushtetutës nuk mund të mbrojmë shqiptarët nga hajdutë si Edi Rama. Nuk mbrohet Kushtetuta nga kriminelë si Edi Rama. Pa mbrojtjen e kushtetutës nuk mbrohet Kushtetuta nga plaçkitësit Karlo Bollino me shokë”, shtoi ai.
Gjatë fjalës së tij, kryedemokrati rishpehu shqetësimin se kryeministri Edi Rama po bllokon në mënyrë antikushtetuese komisionet hetimore parlamentare të kërkuara nga opozita. Kjo po ndosh, pasi sipas tij, kreu i qeverisë Edi Rama nuk lejon komisionet parlamentare “është vetë strumbullari i të gjitha vjedhjeve”.
“Të gjitha këto janë një motiv që të qëndrojmë për kushtetutën. Ka një nen kushtetuta që njeh të drejtë të pacenueshme të pakundërshtueshme të deputetëve të opozitës që me numër të caktuar të firmave të ngrejnë komisionet hetimore parlamentare. Edi Rama nuk e lejon këtë sepse në të gjitha komisionet ai del strumbullar i tyre. Ai del strumbullar në aferën McGonigal… Edi Rama nuk lejon komision hetimor parlament për patronazhistët se është vetë njeriu që e ka ndërtuar atë. Nuk lejon komision hetimor parlamentar për TIMS sepse ai me të ka zhdukur, do të zhdukë gjurmët e udhëtimeve me dhjetëra e dhjetëra herë me trafikantët. Të Edi Ramës me charterin e tij privat. Lidhet dhe fluturimet e Taulant Ballës me bajlozët e krimit dhe drogës. Edi Rama nuk lejon Komisionet sepse gjer tani u ka dhënë trafikantëve të drogës, bajlozëve të krimit, qeveritarëve të krimit mbi 6 mln metër katrorë tokë troje turistike të lirë nga taksat për 20 vite”, tha Berisha.
Ai u shpreh se Edi Rama është po ashtu “personi që del strumbullar kryesor i vjedhjes së shekullit me djegësat”.
“Strumbullar kryesor i vjedhjes me koncesionet e shëndetësisë. Së fundi ai po bëhet pronar me Alabarin e tij, i Dubait të Durrësit duke vjedhur dhe përvetësuar mbi 1 milionë metër katror truall publik dhe duke larë aty, miliarda euro me Olsin dhe Amant Josifin, të vjedhura taksapaguesve europiane“, shtoi.
