Anëtari i kryesisë së PD-së, Belind Këlliçi ka folur për privatizimin e ish-kompleksit Partizani.
Ish-kandidati për kryetar bashkie në Tiranë është shprehur se Sali Berisha ka zbatuar programin e tij elektoral, me të cilin erdhi në pushtet.
Këlliçi u shpreh se, SPAK veproi pas një jave mjaft pozitive për opozitën në Shqipëri dhe sapo ajo nisi një lëvizje pa kthim.
“Nuk po goditet vetëm Sali Berisha, por po goditet mirë qeverisja e PD-së, po goditen reformat e PD, ligjet e suksesshme të PD-së, sidomos në 4-vjeçarin më të mirë të qeverisjes që ka parë ky vend, që janë 2005-2009, dhe kjo nuk ka të bëjë vetëm me Berishën, por me historinë e PD.Kjo ka të bërë me reformat e suksese që ndërmori PD, pas vitit 2005.
Për herë të parë po vendoset një standard në Shqipëri, që një ish-kryeministër po goditet se pse ka zbatuar programin e tij elektoral, me të cilin fitoi zgjedhjet dhe erdhi në pushtet. Po goditet një ish-kryeministër, jo pse ka shkelur ndonjë ligj, por se pse ka miratuar ligjin me vendim qeverise. Kjo është një çmenduri. Pse ka miratuar Këshilli i Ministrave një ligj që më pas ka shkuar edhe në parlament, dhe pse ka bërë detyrën e tij kryeministri. Kjo është e padëgjuar.
Me një logjikë të tillë i bie që Sali Berisha në momentin që zgjidhet kryeministër, i bie që as fëmijët e tij, as të afërmit e tij, as të mos punonin më, as të kishin jetën e tyre, po të ishin të papunë me këtë standard që ka vendosur SPAK.
Kjo erdhi si një goditje pas një jave tejet pozitive dhe intensive që kemi parë javën e kaluar, ku politikisht PD në parlament pati një përballje shumë të fortë me mazhorancën. Lindita Nikolla javën e kaluar i caktoi edhe kë ka kryetar grupi parlamentar dhe kë do të ketë në reformën zgjedhore. Pas kësaj përballje të fortë në parlament, ku u deklaruar nisja e një lëvizje pa kthim pas, ku do të përdoreshin të gjithë mjetet e mosbindjes civile për të rrëzuar këtë regjim, goditja erdhi brenda 72 orësh me shfaqjen mediatike dhe goditjen e radhës, kësaj radhe ndaj vetë Sali Berishës”, tha Këlliçi per SYRI TV.
