Politologu Ilir Kalemaj duke folur në MCN Live tha se është folur se hetimi ndaj Berishës ka nisur që të pengohet përmes dekriminalizimit që të kandidojë në zgjedhjet e 2025-ës.
Sipas Kalemajt kjo mund të prodhojë efektin “boomerang” dhe ta rifaktorizojë ish-kryeministrin.
“Në rrafshin juridik, ne kemi pasur precedentin e rastit Tahiri ku është kërkuar një autorizim nga Kuvendi qoftë për arrest, qoftë për kontroll banese. Në rastin Ahmetaj jo. Nuk u mor masa e sigurisë, sepse po të ishte marrë, nuk do kishte ikur nga Shqipëria. Dëmi që ai i ka shkaktuar buxhetit të shtetit është disafish më i lartë, bashkë me dy ortakët e tij, dy Mirelët. Kjo është nga ana juridike.
Të interpretimi 288/289 të Kodit të Procedurës Civile ha debat nëse është kufizim lirie apo jo. Është më tepër një mesazh politik që i jepet Berishës, nuk është se ai do ikte dhe do arratisej jashtë. Por a po e dëmton politikisht kjo PD-në dhe Berishën? Mund të merret edhe si shmangie nga drejtësia, që po shmanget me procedurë. Interpretimi politik i gjësë na intereson në këto momente, sepse kishim një aksion të paralajmëruar të PD-së, që do përfshinte protestat masive, bashkë me aksionin parlamentar dhe ekstra parlamentar.
Është folur këto ditë që kjo bëhet për z.Berisha që të mos kandidojë për deputet në 2025-ën. Nëse është një plan për ta hequr Berishën në këtë mënyrë, kjo mund të prodhojë boomerang, sepse e rifaktorizon Berishën. Një zgjidhje mund të ishte që grupi parlamentar i PD ta çonte në Gjykatën Kushtetuese, por duket se ka marrë një vendim që të mos përfshihet me këtë çështje, të konsiderohet private, dhe PD të vazhdojë me aksionin e saj politik”.
Kalemaj tha se opozitës i mungon strategjia, si dhe fytyrat e reja dhe një alternativë e re.
“Me kaq skandale që prodhon kjo qeveri do kishte rënë 10 herë. Sot dëgjova që u arrestua ish-drejtoresha e Kadastrës së Durrësit. Qeveri shumë e korruptuar, duhet të ikte një orë e më parë. Pse opozita nuk po vjen në pushtet? E para është strategjia. Nëse merreni sa vota ju duhen për të ardhur ju në pushtet, ju duhen të paktën 300 mijë që të vini në pushtet. Ju thoni që populli, intelektualët, mediat, s’na mbështesin. Unë mendoj se ata nuk bashkëngjiten sepse thonë janë po të njëjtët njerëz që kanë po 30 vjet aty, Flamur Noka, Paloka. Pse duhet ai qytetari gri, ai i shtresës së mesme që s’ka ndonjë interes për të plaçkitur shtetin, pse duhet të votojë këtë alternativë, që mund të jetë pak më e mirë se pala tjetër, por prapë janë të njëjtat xhaketa. Fytyra të reja, xhaketa të reja nuk shikojmë, alternativë të re nuk shikojmë, program të ri nuk shikojmë”.
