Barcelona vuan por “rrëmben” 3 pikët në shtëpi ndaj Shakhtar Donetsk në ndeshjen e vlefshme për grupet e Champions League. Një sukses 2-1, në një “betejë” mjaft emocionuese. Në minutat e para mysafirët ukrainas rezistuan mjaft mirë, madje provuan të befasonin kundërshtarin edhe me kundërsulme.
Gjithsesi, katalanasit zhbllokuan takimin në minutën e 28-të. Një goditje e bukur e Torres shkoi pas shpinës së Riznyk, por VAR ndërhyri dhe për konfirmimin e golit, u nevojit ndërhyrja e teknologjisë.
Arbitri sllovak Kruzliak legjitimoi festën e tifozëve, të cilët kishin ardhur në Estadio Olímpico (Barcelona) për të ndjekur skuadrën e zemrës. Brenda pjesës së parë, të besuarit e Xavit dyfishuan me Fermin Lopez.
Për Lopez ishte goli i tij i parë në kompeticionin më të madh për klube, UEFA Champions League. Çerek ore pas fillimit të pjesës së dytë, një asist magjik nxjerr blof mbrojtjen e Barcelonës, me Sudakov që ia del të ngushtojë shifrat.
Spanjollët u hodhën në sulm për të siguruar 3 pikët. Fillimisht ishte një shtyllë që “tronditi” portën e Shakhtar, e më pas një gol i anuluar i Barcelonës. Me këtë rezultat, Barcelona koleksionon 9 pikë në 3 ndeshje dhe është në vendin e parë në Grupin H. Shakhtar renditet në vendin e 3-të me 3 pikë.
Në Grupin E, mbrëmje për t’u harruar për Lazion. Italianët e drejtuar nga Mauricio Sarri pësuan disfatë 3-1 në Roterdam nga Feyenoord. Elseid Hysaj me shokë ishin të pafuqishëm përballë uraganit holandez, me këta të fundit që triumfuan falë dopietës së Gimenez dhe golit të Zerroukit.
Goli i Pedros erdhi tepër vonë, vetëm në fund. Sa i takon situatës në grup, lacialët janë në vendin e 3-të me 4 pikë, ndërsa Feyenoord kryeson me 6 pikë.
