Trafiku është fenomeni më shqetësues me të cilën qytetarët e Tiranë përballen çdo ditë në rrugët e kryeqytetit.
Është bërë e zakonshme që kamionët të qarkullojnë në rrugët kryesore të kryeqytetit në oraret e ndaluara, kur të gjithë qytetarët vrapojnë për në punë ose shkollë.
Pak ditë para nisjes së këtij viti shkollor, kryebashkiaku i Tiranës, Erion Veliaj thoshte me krenari se do të sigurohet që orari 7 me 9 i dedikohet vetëm lëvizjes në shkolla. Por si gjithmonë fjalët e tij mbeten vetëm fjalë.
“Do të sigurohemi që orari 7 me 9 i dedikohet vetëm lëvizjes në shkolla. Gjithashtu, nga ora 07:00 e mëngjesit deri në 08:00 të darkës fadroma, betoniere, kamionë, trajlera, nuk do të lejohen, dhe të gjitha kantieret e Tiranës, siç e kemi zbatuar vitet e fundit, do duhet të punojnë pas orës 20:00 të darkës”- deklaronte Veliaj.
Në një video të mbërritur në redaksinë e Boldnews.al shihet një kamion i kompanisë “ALESIO – 2014” shpk. në pronësi të Anton Gjinajt alias Pashuk Gjini. Për këtë firmë si dhe të tjera të lidhura me Gjinajn, Prokuroria e Posaçme ka kërkuar konfiskim në gjykatë. Sipas SPAK, pasuritë janë vënë falë veprimtarisë së paligjshme të Gjinajt. Ky i fundit është dënua në Spanjë në vitin 2010 si pjesëtar i një grupi kriminal të cilit iu sekuestruan mbi 50 kilogramë heroinë, e cila dukej se kishte për destinacion tregun e zonave të turizmit detar në Alicante, Spanjë. Ai shpëtoi nga drejtësia spanjolle dhe erdhi në Shqipëri, ku u mor me biznes dhe ku në vitin 2011 ndryshoi emrin në Anton Gjinaj.
Biznesmeni rezulton se ka përfituar kontrata të majme në procedura tenderuese. Tenderat nga bashkia Tiranë kanë qenë të shumta çka ka ngritur shqetësim te opozita që ka kërkuar hetime nga prokuroria e Posaçme, duke ngritur akuza për korrupsion dhe paligjshmëri në këto procedura.
Në fakt situata e rënduar e trafikut është e njëjtë çdo ditë në Tiranë ku qytetarët përballen me situatën kaotike, rrugët e ngushtuara dhe betonizimin. Përgjegjës për situatën kaotike në kryeqytet është kryebashkiaku socialist Erion Veliaj i cili e ka kthyer Tiranën në një kantier të madh ndërtimi, fluks makinash dhe ajër i ndotur.
Fatkeqësisht, dita e një qytetari në Tiranë nis me stres e ankth, ku të gjithë vrapojnë për të arritur në orar në destinacionet e tyre, disa të tjerë duhet të dalin një orë para nga shtëpia për të kapur autobusin, pasi metropoli zhytet në kaos trafiku që në orët e para të mëngjesit.
Trafiku rëndohet edhe në orët e pasdites, kur qytetarët kthehen nga puna.
