Kryetari i Partisë Demokrate Sali Berisha komentoi raportimet mediatike lidhur me largimin e Ardiu Veliut si drejtues i Agjencisë së Mbikëqyrjes Policore. Edhe pse s’ka ende një konfirmim zyrtar për këtë lëvizje, Berisha tha këtë të enjte se Veliu ka dhënë dorëheqjen pasi janë zbuluar përgjime të tij me banda kriminale.
“Dha dorëheqjen sepse është gjetur me Encrochat dhe SKYEÇ në kominikim me bandat më të rrezikshme. Por famëziu balla që i kërkon dorëheqjen është shimë më i regjistruar se ardi veliu në ato SKYEÇ dhe encrochat. E them me përgjegjësi të plotë. Ne jemi në këto kushte”, tha Berisha në emisionin “Open”.
Sipas një raportimi mediatik, arsyeja që Veliu ka vendosur të japë dorëheqjen është “sepse emri i tij ka dalë në dosjen e sjellë nga Franca në mesazhet e SKYEÇ, në komunikime me trafikantë të ndryshëm, para zgjedhjeve të vitit 2021”.
Berisha tha gjithashtu se nga 8 mijë telefona të kriptuar që janë përdorur në Shqipëri, pjesa më e madhe janë përdorur në Kryeministri.
“Ja ku janë 3 telefonat e kriptuar të Ardi Veliut. Janë përdorur dhe nga Taulant Balla. Kanë pasur përqendrimin më të lartë në Shqipëri në ndërtesën e Këshillit të Ministrave. Më kanë thënë që kur përdor atë aplikacion, merr fund pjesa tjetër. Në Kryeministri ka pasur përqendrimin më të lartë në Shqipëri, këta telefona. Nga 8 mijë telefona të kriptuar, Kryeministria ka pasur përqendrimin më të lartë të tyre”, deklaroi Berisha.
Aksioni opozitar
Nisur me përshkallëzimin e aksionit opozitar që nisi sot në parlament, ku deputetë të opozitës penguan zhvillimin normal të seancës plenare, Berisha tha se kjo lëvizje do të vijojë.
“Do luftojmë, sepse ne jemi para zgjedhjes të luftojmë apo të bojkotojmë, bojkotin nuk e bëjmë”, tha ai. “Fillimi është ky, qëllimi është vazhdimi i saj deri në kthimin e votës së lirë të shqiptarëve. Kjo nuk ka të ndalur, sepse jetojmë në kushtet e një monokracie të vërtetë”, u shpreh. Ai tha se në aksionin e saj opozita do të përdorë “mjetet që ka përdorur çdo lëvizje popullore”.
Kryedemokrati u shpreh se arsyet që u arrit në këtë vendim janë shtypja me votë nga mazhoranca i nismave të ndërmarrë nga opozita në parlament, përfshirë këtu projektligjet, rezoluta dhe komisionet hetimore që janë kërkuar nga PD.
“Kemi dorëzuar në 2 vite 31 ligje dhe 1 ose dy rezoluta që Rama i arkivon në sirtarët e Linda Nikollës, që s’mund të ndodhë kurrë. Kemi kërkuar 6 komisione parlamentare që në Kushtetutë është taksativ dhe këta secilin prej tyre e kanë kundërshtuar me qëllim e vetëm sepse Rama s’mund të pranojë të hetohet afera McGonigal për shkak se bashkë me Dorian Duçkën dhe Agron Nezën kanë vepruar si grup kriminal. Ka një shkelje universale të ligjit të konfliktit të interesit. S’ka institucion që mund të kontrollojë zbatimin e ligjit. Dhe këta nuk e lejojnë, po pse? Sepse shkeljet e panumërta janë te Edi Rama dhe familja Rama. Edi Rama s’duhet të kishte sot mandatin e deputetit. S’lejon koncesionet në shëndetësi të hetohen sepse është pas tyre. është pas aferës së sterilizimit”, tha Berisha.
Duke u ndaluar te refuzimi nga mazhoranca i kërkesës së PD për ndryshim të përbërjes së komisionit për reformën zgjedhore, Berisha tha se Ramës i duhet Enkeljd Alibeaj (bashkëkryetar i komisionit) “për arsye se ka peng Lul Bashën Bashën dhe atë (Alibeajn) dhe ata bëjnë çfarë u thotë, marrin porosi nga Taulant Balla dhe i zbatojnë”.
“Njëherë beteja në parlament dhe pastaj vazhdon beteja jashtë”, theksoi Berisha, duke shtuar se qëllimi është rikthimi i pluralitetit parlamentar dhe i votës së lirë për shqiptarët.
“Rama loboi kundër Kosovës”
Kryedemokrati dënoi qëndrimet e kryeministrit Edi Rama karshi qeverisë së Kosovës. Lidhur me deklaratat e fundit të Presidentit të Francës Macron gjatë vizitës në Tiranës që u interpretua si një kërcënim ndaj Kosovës për anulimin e procesit të liberalizimit të vizave, Berisha tha se ka pasur një lobim nga ana e Ramës në këtë aspekt.
“Rama loboi te Macron për llogari të Serbisë që Kosovës ti hiqen vizat”, akuzoi Berisha.
Lexo edhe – Berisha: Basha sulmoi në parlament Papulin, pasi mori vilat s’e përmendi më
