19.5 miliardë lekë, ose rreth 180 milionë euroj anë dëmet e shkaktuara nga institucionet e shtetit në vetëm 8 muajt e parë të vitit 2023.
Në analizën e Kontrollit të Lartë të Shtetit për harkun e muajve janar-gusht, rezulton se gati 4.8 miliardë lekë janë dëm ekonomik, ndërsa 14.7 miliardë menaxhim jo i duhur i fondeve publike.
“Fakti që shumica e tenderave fitohen nga me një ofertues të vetëm ose edhe aty ku ka më shumë se një ofertë është vetëm ofertë teknike do të thotë që gjendet se kush duhet ta fitojë tenderin. I thuhet sill një apo dy oferta të tjera teknike, dokumentat janë të gatshëm dokumenta standarde dhe as ofertë financiare asgjë, siç ndodh me rekrutimet në administratën publike“, tha eksperti i ekonomisë Zef Preçi.
Sipas KLSH, pjesa më e madhe e dëmit ekonomik të gjetur deri në gusht ka ndodhur te shpenzimet, pra te pagesat e institucioneve për punët e kryera nga kompanitë. Pjesa tjetër, 3.7 miliardë lekë janë si mos-administrim i duhur i të ardhurave.
“Ka dy të këqija. E para ushqen korrupsionin, votëblerjen, etj dhe gjenerohen para duke përdorur në mënyrë jo eficente fondet publike, ushqen korrupsionin njëkohësisht dhe së dyti ka një efekt kaskadë. Pas çdo vendimmarrje të rëndësishme, për sa kohë nuk është pjesëmarrja direkte e kompanive mesme, të vogla, etj, detyrimisht që përnderohet fitimi vetëm në pak duar”, deklaroi Preçi.
Kontrolli i Lartë i Shtetit ka kërkuar vendosjen e 542 masave disiplinore dhe 41 të tjerave administrative ndaj nëpunësve të institucioneve ku është gjetur dëm ekonomik.
/A2CNN/
