Policia e Shkodrës ka zbuluar një “shtëpi bari” në fshatin Trush i Poshtëm, njësia administrative Bushat.
Sipas autoriteteve policore, një banesë e pabanuar në këtë fshat ishte përshtatur për kultivim të bimëve narkotike. Policia bën me dije se në pjesën hyrëse të banesës dhe në katër dhomat e saj, ka gjetur dhjetëra bimë narkotike të kultivuara në vazo, me anë të llambave elektrike.
Nga këqyrja e ambienteve të banesës, përveç bimëve narkotike të kultivuara në vazo, është konstatuar dhe një sistem i përparuar elektrik dhe kondicionimi, i cili ishte i montuar në të katërta dhomat e banesës dhe në hyrje të saj.
Blutë e Shkodrës, në momentin e futjes në banesë kanë gjetur duke u kujdesuar për bimët narkotike, shtetasi Lorenc Trieshi, 34 vjeç, banues në Fushë Kuqe, Kurbin.
Ai është vënë në pranga, teksa bashkë me të, në kuadër të operacionit policor të koduar “Trushi” janë arrestuar dhe shtetasit Dedë Laca, 64 vjeç dhe djali i tij Anton Laca, 36 vjeç, si autorë të kësaj veprimtarie kriminale. Raportohet se Lorenc Trieshi është nipi i shtetasit Dedë Laca.
Në cilësinë e provës materiale, uniformat blu kanë sekuestruar 82 llamba dhe aparate të ndryshme elektrike, 5 aspiratorë, si dhe u morën për ekspertim 123 bimë narkotike që ishin kultivuar në vazo. Gjithashtu, nga kontrolli përreth banesës, në një ambient tjetër të përshtatur për tharjen e bimëve narkotike, janë gjetur dhe dy mjete lundruese tip “Jet Ski”, pa dokumentacion.
Në vijim të operacionit, gjatë kontrollit të ushtruar në banesën e organizatorëve të kësaj veprimtarie kriminale, janë gjetën dhe një armë zjarri kallashnikov me 2 karikatorë me fishekë, 1 armë gjahu sportive, 2 automjete, tip “Range Rover” dhe tip “Benz”, prodhime të viteve të fundit.
Tre të arrestuarit akuzohen për veprat penale “Kultivimi i bimëve narkotike”, “Mbajtja pa leje dhe prodhimi i armëve, armëve shpërthyese dhe municionit” dhe “Vjedhja e energjisë elektrike”, të kryera në bashkëpunim.
Policia njofton se nga këqyrja e banesës është konstatuar dhe se kishte lidhje të paligjshme të energjisë elektrike, që shërbente për furnizimin e pajisjeve elektrike që përdoreshin për kultivimin e bimëve narkotike. Në vijim të operacionit u shoqëruan në ambientet e Policisë, kryetari i fshatit Trush i Poshtëm, shtetasi K. D., 38 vjeç, lexuesi i matësve elektrikë në zonë, shtetasi Z. N., 26 vjeç, si dhe elektricisti i zonës, shtetasi F. H., 29 vjeç, ndaj të cilëve u referuan materialet procedurale në Prokurori ku nisi procedimi në gjendje të lirë, për veprën penale “Shpërdorimi i detyrës”.
