Nga Boldnews.al
Nusja e “Rilindjes” së Edi Ramës kërkon të martohet… Do një pasunar për “dhëndër”, t’i ketë gjërat të gjithë gati. Ta presin me këngë e valle në një banket ku të gjithë hanë e pinë jo vetëm pa paguar asgjë, por edhe duke marrë ndonjë shuk me euro, pasi të jenë dehur e harbuar nga “dasma e madhe”. Ajo thotë se jam bërë gati. Ka veshur tangat e holla, reçipetat transparente, fustanin e nusërisë të stolisur bukur dhe bërtet se jam e virgjër, e pastër dhe nikoqire e madhe. Ai, dhëndri, refuzon e refuzon, duke kërkuar që kjo nuse e re që në të shkuarën e madje të tashmen ka kaluar “hu më hu” reformash, duhet të harrojë të kaluarën dhe të sillet si europiane.
Por ajo nusja e Rilindjes nuk ndryshon. Bërtet se është e pastër dhe e virgjër kur ka kaluar dorë më dorë të kriminelëve të lidhur me politikën. Është përfshirë në korrupsion aty në nivelet më të larta qeverisëse. Ka futur duart në tjetërsimin e rezultatit zgjedhor në shitblerjen e votave. Bën batërdinë me paranë publike, shkuan deri aty sa edhe lekët e BE-së që ishin të destinuara për bujqësinë tonë i la në “rulotën e korrupsionit”. Por sërish ajo ka guxim, madje ulëret që të martohet me këtë dhëndrin e BE-së së madhe…
Me batuta të dala boje, Rama qesh me veten dhe i duket sikur ka thënë një “aforizëm të madh” teksa shprehet se “nusja është gati, dasma po bëhet por dhëndri nuk po vjen”. Me këtë i referohet faktit se sipas tij Shqipëria është në hapin e kohës, i ka plotësuar të gjitha kriteret por Europa nuk po na integron. Përgjigjen ja dha Presidenti i Këshillit të Europës, Charls Michel. “E di Edi, që e keni krahasuar zgjerimin me një nuse kur dhëndri nuk vjen në dasmë. Ne po e përgatisim këtë dasmë. Në BE zgjerimi është një proces i bazuar në meritë, dhe duhet ta bëjnë që gjërat të lëvizin përmes reformave dhe nga ana jonë për nisjen e debatit serioz të zgjerimit”, tha Michel.
Me pak fjalë edhe një herë “nuses Rilindase” i thanë ta heqë fustanin e nusërisë, të ndalin ahengjet dhe të mendojnë për të ndryshuar dhe jo për të ulëritur për virgjërinë, kur s’ka lënë motel pa shkelur duke u ngjizur në orgjinë krim-politike dhe përzier keqas në trafikun ndërkombëtar të narkotikeve. Po kjo “nuse qeverie” thotë se ka ndryshuar sepse po funksionon reforma në drejtësi, por edhe këtë dhëndri nuk e beson fare pasi e ka të qartë se fijet e drejtësisë tërhiqen nga “babi i nuses” që ka pjellë këtë “bijë të përdalë”.
Ngado të sillet e ka të vështirë të ndryshojë, sepse as nuk e do ndryshimin. Nuk mund të rrijë pa u harbuar me krimin, pa dalë “natën vonë” nëpër bodrumet ku shkëmbehet paraja e korrupsionit që rrëmbehet nga xhepat e qytetarëve. Pasi ka bërë të zezat në sytë e të tjerëve, lan sytë, podroset, vësh vellon dhe thotë se është gati për martesë. Cili “burrë” e do këtë “nusen Rilindase”? Para se të shkojnë në divorc të sigurt nëse “martohen” “dhëndri” ka vendosur të mos vijë fare, sepse nevojitet një nuse tjetër, të cilin Rilindja asesi nuk mund ta lindë dhe rrisë. Vetëm njërën ka, atë se merr kush!
