Kryetarja e Kuvendit, Lindita Nikolla, në fund të seancës së sotme, në mënyrë të papritur futi në rendin e ditës tre kërkesat e opozitës, të bëra në seancës e kaluar.
Bëhet fjalë për ngritjen e komisioneve hetimore për rrjedhjen e të dhënave nga sistemi TIMS dhe koncesionet ne shëndetësi, si dhe ndryshimin e përbërjes së anëtarëve të komisionit për reformën zgjedhore. Të treja kërkesat janë rrëzuar me votat e mazhorancës, teksa opozita e revoltuar ka bllokuar foltore.
Më konkretisht:
-Rrëzohet me 70 vota kërkesa për Komision Hetimor për daljen e të dhënave personale
-Rrëzohet me 71 vota kërkesa për Komision Hetimor për koncesionet në shëndetësi
-Rrëzohet me 71 vota kërkesa e Bardhit për ndryshim të Komisionit të Reformës zgjedhore
Pas këtij akti nga mazhoranca, kreu i PD-së, Sali Berisha ka reaguar ashpër, teksa ka folur për mediat nga oborri i Kuvendit. Ai deklaroi se Nikolla shkeli me të dy këmbët rregulloren e parlamentit, pasi sipas tij, në çdo parlament rendi i ditës miratohet në mëngjes dhe se në mëngjes në rend të ditës ishte vetëm rezoluta për Kosovën.
Berisha tha se akti i Edi Ramës për ti përcaktuar opozitës në reformën zgjedhore, AliBashën është përjashtimi i opozitës nga parlamentit dhe ekzekutimi i pluralizmit politik në parlament.
“Pak çaste më parë, shqiptarët panë një akt rrugaqërie të pashembullt në parlamentin shqiptar. Ajo që kryen detyrën e kryetarit, faktikisht një njeri i keqpërdorur në shkallën më ekstreme nga Edi Rama, duke shkelur me të dy këmbët rregulloren e parlamentit, futi në rend të ditës, pas miratimit të rezolutës atë që nuk mund të ndodhte kurrë, sepse në çdo parlament rendi i ditës miratohet në mëngjes dhe në mëngjes ishte vetëm rezoluta për Kosovën. Por në një mënyrë tinëzare, banditeske, e keqpërdorura në shkallë ekstreme që kryeson seancat e parlamentit, futi çështjet themelore, kërkesat e opozitës për komisione hetimor parlamentare dhe vendimin e Edi Ramës për ti përcaktuar opozitës në reformën zgjedhore, AliBashën. Ju e patë vetë se çfarë skene e shëmtuar ishte kjo. Një skenë e tillë mund të ndodhë vetëm në parlamentin e Bjellorusisë. Faktikisht ky është përjashtimi i opozitës nga parlamentit. Faktikisht ky është ekzekutimi i pluralizmit politik në parlament.
Kjo qeveri që qëndron mbi krimin, drogën dhe vjedhjen, nuk respekton më asnjë lloj norme dhe parimi, institucional në parlament apo jashtë tij. Koha po vjen për një përgjigje të fuqishme popullore, përndryshe unë ju garantoj se demokracia në Shqipëri është në grahmat e fundit të saj. Dënoj me ashpërsinë më të madhe këtë qëndrim të Edi Ramës, i cili i damkosur dhe i diskredituar në shkallë kombëtare dhe ndërkombëtarë bën gjithçka për të mbajtur pushtetin e tij. Edi Rama me aktet e tij, me vjedhjet monstruoze që ka bërë, aferat e mëdha që është implikuar, aferën McGonigal dhe lidhjet e tij patologjike me Aleksandër Vuçiç është pra një armik i të gjithë shqiptarëve. Ndaj dhe jam këtu, për ti bërë thirrje popullit opozitar të ngrihemi një minutë e më parë kundër këtij regjimi, që nuk respekton, por shkelmon çdo ditë, liritë të drejtat e opozitës dhe qytetarëve në tërësi.” – deklaroi Berisha.
