Deputeti i PD-së Edi Paloka ka mohuar të ketë një krisje të aleancës mes Partisë Demokratike dhe Partisë së Lirisë, së drejtuar nga Ilir Meta.
Duke folur në MCN tv, Paloka sqaroi se nuk do të ngrihet asnjë forcë e re politike nga deputetët e PD-së.
“Nuk e di kush i ka këto fantazi, por janë thjesht fantazi. Nuk e kam dëgjuar këtë intervistë të Metës, por nuk besoj se e ka thënë kështu pasi nuk ka arsye. Nuk besoj se Meta ka ndryshuar qëndrim. I jap të drejtën vetes të mos e besoj. Nuk shoh asnjë arsye pse duhet të ketë krisje apo problematika. Nuk di të ketë ndryshuar asgjë nga ne dhe as nga PL. Kjo që thoni ju, as nuk e mendoj se mund të ketë një gjë të vërtetë, si fakt.
Së pari duhet ta dini që të gjithë kanë të drejtë të ndryshojnë qëndrim dhe mendim. Bashkimi i grupit parlamentar nuk është se ndodhi fap-fap brenda ditës dhe erdhi papritur, apo se ndryshoi qëndrim Bardhi apo se ndryshuam qëndrim ne. Është një marrëveshje e arritur pas një rruge të gjatë. Kemi 2 vjet që kemi vërtetuar që përçarja që erdhi në PD ishte e nxitur nga Rama me të gjitha mënyrat. Mcgonigal është vetëm një nga mjetet, por edhe të gjitha mënyrat e tjera, por sidomos Bashën që e përdori si mashën e tij për ta mbajtur këtë përçarje.
Kjo strategji pas 2 vitesh u kuptua nga shumica e deputetëve dhe faktet që erdhën pas 9 shtatorit tregojnë që Berisha dhe demokratët janë faktori numër 1 në opozitë. Kush kërkon të luftojë këtë qeveri duhet ta pranojë këtë realitet dhe këtë ka thënë dhe vetë Bardhi. Është realitet që s’mund ta mohojë askush. Bardhi dhe deputetët e tjerë mbajnë qëndrimet e tyre që mund të jetë të ndryshme, por nuk pengon askënd që të bashkohemi.
Duke pasur një qëllim të përbashkët përballjen dhe përmbysjen e kësaj qeveria është kuptuar nga shumica e demokratëve prej kohësh që nuk ka rrugë tjetër veç bashkimit. U kuptua dhe nga deputetët që duan të jenë opozitë veç atyre që pranon Rama. Janë bërë dhe publike deklarata të tilla që duke pasur parasysh faktin që drejtësia kontrollohet nga Rama dhe ky është fatalitet që duhet të ngrihej si problem nga media. Jemi në një regjim diktatorial të fshehur, nuk është regjimi i Enverit që të fuste në burg, por është regjim diktatorial që nuk lejon shqiptarët të zgjedhin, dhe fjalën ka filluar ta pengojë.
Kur drejtësia është kapur nga Rama nga reforma në drejtësi, kur duket që gjykatat marrin urdhra nga Rama, një pjesë e deputetëve kanë parë një rrugëzgjidhje dhe formimin e një partie të re. Po kjo ka hasur në kundërshtimin e shumicës dhe argumentet e shumicës që nuk është kjo zgjidhja, kur jemi përpara një fakti të detyrueshëm.” – u shpreh deputeti i PD.
Paloka mohoi çdo mundësi bashkëpunimi me Bashën. Sipas deputetit duhet rrëzuar regjimi i Ramës, pasi asnjë mjet tjetër nuk mjafton për ta ndryshuar këtë situatë.
“Nuk ka rrugë tjetër që opozita dhe shqiptarët ta ndryshojnë realitet. Kush ka iluzione se mund të vazhdojmë të tentojmë duke rregulluar Kodin zgjedhor, apo pjesët anësore duke u marrë me detaje të parëndësishme dhe të hyjmë në zgjedhje dhe të prodhohet masakra e radhës, kush i ka këto iluzione ose është jashtë realitetit ose është i zhytur kokë e këmbë në politikën që ndjek Rama. Nuk ka rrugë tjetër me Ramën, përveç forcës, protestës dhe rrëzimit të kësaj qeverie.” – tha Paloka.
