Presidenti Aleksandër Vuçiç ka deklaruar se nuk mund ta ekstradojë ish-nënkryetarin e Listës Serbe, Milan Radoiçiçin në Prishtinë sepse Beogradi nuk e njeh Kosovën. Ndërsa theksoi se Radoiçiç ishte ishte aleat i ngushtë i tij, por jo mik.
“Nuk mund ta ekstradoj Milan Radoiçiqin në Prishtinë, sepse ne nuk e njohim Kosovën, ai ishte aleat i ngushtë i imi, por jo mik”, tha presidenti i Serbisë, Aleksandër Vuçiç, në një intervistë për “Sky News”.
I pyetur për pretendimet e Prishtinës se Beogradi ka planifikuar sulmin në Banjskë, presidenti i Serbisë thotë se “është gjithmonë më e lehtë të akuzosh Beogradin”.
“Kush do të besojë se në fakt është ndryshe, pothuajse askush”, tha Vuçiç.
Presidenti Vuçiç u shpreh se pjesëtarët e Policisë së Kosovës përdorin edhe armë të prodhuara në Serbi, por që Beogradi nuk ua ka shitur atyre.
“Ata djem që ndiqnin serbët dhe që janë nga Policia e Kosovës, mbanin AK të prodhuara këtu në Kragujevc”, tha Vuçiç.
Presidenti serb shprehu bindjen se është e lehtë të gjesh armë dhe jo vetëm në tregun e zi.
“Njerëzit gjithmonë do t’i mbështesin njerëzit që duan të mbrojnë, sepse nga këndvështrimi ynë, nga këndvështrimi i serbëve, ajo është pjesë e Serbisë, sipas Kushtetutës sonë Prandaj them që nuk është diçka që lejohet, por them që nuk është aq e vështirë”, tha Vuçiç.
Ai foli për Sky news edhe për Milan Radoiçiçin, të cilin autoritetet e Prishtinës e cilësuan si lider të një “grupi terrorist” dhe i cili akuzohet nga autoritetet në Serbi për disa krime në lidhje me ngjarjet në Banjskë.
“Nuk ka dyshim, ai ka qenë nënkryetar i Listës Serbe. Ai është akuzuar, ishte një krim i madh, i madh”, theksoi Vuçiç.
I pyetur se pse nuk e ekstradon Radoiçiçin në Prishtinë, ai u përgjigj me pyetje: “A po tallesh me mua apo çfarë? Po ju pyes sepse e dini se ne nuk mund të ekstradojmë askënd në Prishtinë, sepse nuk e njohim Kosovën si shtet.”
Milan Radoiçiç akuzohet se ishte udhëheqësi i sulmit terrorist të 24 shtatorit në Banjskë në Veri të Kosovë, ku u vra në krye të detyrës efektivi i Policisë së Kosovës, Afrim Bunjaku dhe u plagosën dy të tjerë. Kjo e vërtetuar përmes pamjeve filmike dhe e pranuar më vonë dhe prej tij, ku dha dorëheqjen dhe nga posti i nënkryetarit të Listës Srbska.
Më 30 shtator, Radojçiç iu përgjigj një ftese të autoriteteve serbe për të dhënë versionin e tij lidhur me atë që ndodhi në Banjskë të Kosovës më 24 shtator. Avokati i tij mbrojtës lexoi letrën ku merrte përgjegjësi të plotë, ndërsa në shumicën e fjalive përpiqej që të shfajësonte Serbinë, presidentin Vuçiç dhe Listën Serbe. Mes rreshtave konfirmoi dhe akuzën e autoriteteve të Kosovës, teksa theksoi se synimi i sulmit të armatosur ishte nxitja e rebelimit të serbëve lokalë në veri të Kosovës për të vendosur një lloj autonomie me forcë.
Kujtojmë se pas ngjarjes së rëndë, Forcat Speciale të Policisë së Kosovës rrethuan manastirin e Banjskës dhe nga përplasja me armë zjarri u ekzekutuan tre terroristët Stefan Nedeljković, Igor Milenkvić, Bojan Mijailović.
