64 familje të një pallati në lagjen 12 në qytetin e Durrësit presin ende nisjen e punimeve për riparimin e dëmeve të tërmetit të 26 nëntorit të vitit 2019.
Ditën e sotme ata kanë dalë në protestën e radhës para bashkisë, teksa përfaqësuesit e familjeve të pallatit në Durrës shprehen se kanë 4 vite që presin. Edhe pse për pak ditë mbushen 4 vjet nga tërmeti i vitit 2019, në pallatin nr 15 puna nuk nisur akoma. Banorët të shqetësuar shprehen se nuk dinë se çfarë të bëjnë në këtë pikë që kanë ardhur gjërat, pasi prej 6 muajsh nuk marrin as bonusin e qirasë.
“Ne kemi bërë 40 protesta, kemi 4 vjet, bashkia thonë do të fillojmë pallatin jo këtë muaj, jo mbas dy tre muajsh, me gënjeshtra.
Na gënjejnë. Kryetarja sidomos, na ka thënë se në Maj do të fillojmë me fondet tona. Tani thonë s’kemi fonde, ku i çuan fondet këta?”
Nga ministria përkatëse na thonë se çështja i takon bashkisë dhe se fondet i kanë kaluar bashkisë. Ndërkohë që nga bashkia na thonë se po presim fonde nga ministria.
Ne jemi nevojtarë. Unë për shembull jemi me 100 mijë lekë unë dhe 100 mijë lekë çuni, çfarë të bëjmë? Marrim borxhe që kalojmë muajin.
Ne jemi pa bonus pa asnjë gjë. Ne tani do futemi nëpër shtëpia se s’kemi çfarë të bëjmë. Ja do hap derën e do futem. Dhe shiko muret si janë, do mbajë përgjegjësi shteti nëse më bie ndonjë tullë në kokë. Unë jam me një pension 100 mijë lekë ku t’i gjej.
Na vjen shumë keq! Janë 60 e ca familje këtu brenda dhe po rrinë rrugëve.” – janë disa prej deklaratave të protestuesve.
Banorët kanë shkuar shume herë në bashki, kanë bërë edhe protesta të shumta për problemin e tyre, por ajo që iu është thënë është se për pallatin tuaj do të kërkohet fond i veçantë nga Ministria e Financave.
Pallati ka pësuar dëmtime të shumta të 3 katet e para, ndërkohë që gjatë kësaj periudhe apartamentet janë vjedhur rregullisht nga hajdutët.
