Kolegji i Posaçëm i Apelimit vendosi të shkarkojë nga detyra prokurorin Kujtim Lulin.
Sipas KPA ai nuk ka arritur nivel të besueshëm për kriterin e pasurisë.
Vendimi u dha paraditen e sotme nga trupa gjykuese me kjrytetare Natasha Mulaj.
Luli u konfirmua në detyrë nga Komisioni i Pavarur i Kualifikmit në dhjetor 2020. Kujtojmë që vendimi u kundërshtua nga ish-komisioneri publik, Florian Ballhysa.
Kujtim Luli ka nisur profesion si hetues në Krujë në vitin 1985 me ish-hetuesin e komunizmit Fatmir Xhafën.
Të hënën e kaluar Kolegji i Posaçëm i Apelimit dëgjoi për disa orë kundërshtimet e prokurorit Kujtim Luli ndaj ankimit të Komisionerit Publik që kërkon prishjen e vendimit të Komisionit të Pavarur të Kualifikimit dhe shkarkimin e tij nga detyra.
Prokurori Luli foli gjatë në seancë, por kryesisht me intonacion të ulët dhe nuk u dëgjua qartë. Megjithatë gjatë seancës ai këmbënguli se pretendimet e Komisionerit Publik nuk qëndronin. Ai vuri në dukje se kishte bërë deklarime të detajuara dhe transparente të pasurisë, ndërsa pranoi paskatësi në deklarimet e cashit që siç tha ai kishin ardhur “për shkak të paqartësive” mbi mënyrën e përpilimit të deklarimit në vite.
Luli kundërshtoi qëndrimet e Komisionerit sa i përket pagesave për shkollimin e fëmijëve jashtë vendit, përfitimin e një kredie të butë, deklarimin e cashit dhe pamjaftushëmrinë e financave për disa shpenzime. Gjatë fjalës së tij ai këmbënguli se kishte dokumentuar të ardhurat e ligjshme.
Pasi dëgjoi palët dhe pranoi prova të reja të sjella nga Luli në seancë trupa e kryesuar nga Natasha Mulaj, me anëtare Albana Shtyllën, Sokol Çobon, Rezarta Schuetz dhe Ina Ramën, vendosi të mbyllë shqyrtimin gjyqësore dhe i ftoi palët të përgatisnin konkluzionet përfundimtare.
Kujtim Luli u konfirmua me shumicë votash në 3 dhjetor 2020. Trupa e KPK, e kryesuar nga Olsi Komici, me relatore Brunilda Bekteshi dhe anëtare Xhesila Pine u nda në qëndrime. Komici dhe Bekteshi votuan për konfirmimin e Lulit, ndërsa Pine në pakicë arsyetoi se Luli duhej të ishte shkarkuar. Vendimi i KPK u ankua nga Komisioneri Florian Ballhysa në shkurt 2021. Në ankim Ballhysa është fokusuar në kriterin e pasurisë.
