Tensionet kanë shoqëruar fundin e seancës plenare të kësaj të enjteje që është mbyllur pa votim për projektligjet dhe projektvendimet në rendin e ditës.
Ishte kreu i grupit parlamentar të PD Gazment Bardhi kërkoi nga Kuvendi të miratojë ndryshimet e kërkuara më herët prej tij në përbërjen e komisionit të posaçëm për reformën zgjedhore.
Kërkesa nuk u pranua nga drejtuesja e seancës dhe menjëherë pas këtij vendimi, deputetët demokratë bllokuan foltoren dhe karriget e ministrave. Në këto kushte, kryetarja e Kuvendit Lindita Nikolla njoftoi mbylljen e seancës dhe shtyrjen e votimit. “Mbyllet seanca për sot, votimi do të bëhet në seancën e ardhshme. Natën e mirë”, tha ajo.
Bardhi deklaroi jashtë Kuvendit se mazhoranca po tenton të pengojë përfaqësimin e opozitës në Komisionin e Reformës Zgjedhore.
“Tentativa më e rëndë në 32 vite që mazhoranca ka kryer, prej muajsh mbahet një komision që kulmoi me vendim të marrë skutave. Dhe teatri i mëngjesit ishte pjesë e skenarit për të emëruar opozitën PS në Komisionin e Reformës Zgjedhore. Ka një tentativë të qartë për të penguar përfaqësimin e opozitës në Komision për ta zvarritur finalizimin e reformës zgjedhore”, deklaroi Bardhi për gazetarët.
Kreu i PD Sali Berisha, duke iu referuar Enkelejd Alibeajt, u shpreh se caktimi i bashkëkryetarit të komisionit të reformës nga Rama, është atentat vdekjeprurës për pluralizmin parlamentar. “Deputetë e opozitës bën të pamundur për të bllokuar këtë votim. Pucistët shtyjnë votimin për një javë. Jemi në prag të një situate që nuk ka ekzistuar kurrë në këtë parlament. Nuk kam ndonjë besim se Edi Rama do të tërhiqet. Nuk ka ligësi dhe krim politik të cilin ai nuk është i aftë ta kryejë, por edhe ne do të përgatitemi me të gjitha mundësitë tona për të mbrojtur pluralizmin parlamentar si kushti i të gjitha kushtet për funksionimin e parlamentit”, tha Berisha për gazetarët pas përfundimit të seancës.
Kreu i grupit parlamentar demokrat Bardhi kërkon zëvendësimin në komisionin e reformës zgjedhore të deputetëve të “grupit Basha”. Sipas tij, ata nuk përfaqësojnë Partinë Demokratike dhe opozitën, por janë aleatë me mazhorancën.
Më herët gjatë ditës, Gazment Bardhi i dërgoi një kërkesë kryeparlamentares Lindita Nikolla që të fusë në rendin e ditës propozimin e tij për ndryshimin e përbërjes së Komisionit Parlamentar për reformën zgjedhore. Bardhi kërkoi mes ndryshimeve të tjera që të largojë si bashkëkryetar të komisionit Enkelejd Alibeajn dhe të vendosë Oerd Bylykbashin. Bardhi propozon si anëtarë deputetët: Dhurata Çupi, Dashnor Sula, Ervin Saljanji, Lindita Metaliaj, Tomor Alizoti, Fatmir Mediu, Shpëtim Idrizi dhe Petrit Vasili.
Në shkresën zyrtare dërguar Kuvendit, ai argumentoi se rishikimi i përbërjes se Komisionit të Reformës është domosdoshmëri, pasi për më shumë se 1 vit nuk është bërë asnjë punë dhe disa anëtarë sot nuk janë me deputetë (Grida Duma), për shkak të heqjes dorë nga mandati. Po ashtu, ai shprehet se në seancën e datës 21 shtator, është vendosur që ky projektvendim të futet në seancën e radhës, gjë që nuk është reflektuar nga kryetarja e Kuvendit.
