Është publikuar momentet e eksperimentit hetimor dhe të kqyrjes fizike të të dyshuarit Fatmir Hoxhaj, që akuzohet se është vrasësi i Ahmet Toskës, krim i ndodhur në Fier më 26 Tetor 2020.
Në pamjet e mëposhtme të publikuara nga emisioni “Uniko” bëhet kqyrja fizike e Fatmir Hoxhajt duke e krahasuar me vrasësin që shfaqet në pamjet e kamerave të sigurisë. Në prani të avokates së tij, grupi hetimor i ka veshur Hoxhajt rroba të ngjashme me ato të autorit.
Në dosjen e Prokurorisë së Fierit evidentohet se vrasësi në kamerat e sigurisë ka një ecje atipike. Ndërsa në eksperimentin hetimor që është bërë nga hetuesit, është thënë se ecja e Fatmir Hoxhajt është normale dhe se nuk ka ngecje ose devijim të lëvizjes së këmbëve.
Motra e Fatmir Hoxhajt kërkon lirimin e vëllait të saj nga qelia. Në një intervistë për emisionin Uniko, ajo kërkon që Prokuroria të bëjë ekspertim fizik të autorit që duket në kamerat e sigurisë dhe ta krahasojë me vëllain e saj. Ajo thotë se familja ka bërë një ekspertim privat në Shqipëri e Itali, dhe rezultati ka qenë që vëllai i saj nuk përputhet me vrasësin që duket në video.
“Këtu fjala drejtësi është fjalë e huaj përsa i përket syrit tim. Nuk duam ta dimë kush është, pse, qysh, tek. S’është puna jonë, nuk është interesi jonë. Ne jemi njerëz në hallin tonë, ne erdhën na ranë në qafë, na morën vëllain. Ta krahasojnë, jo me një copë fletë nuk duket apo me një copë fletë nuk bëhet as këtu as jashtë shtetit. Atëherë ne si arritëm ta bënim? Nuk është një gjë e jashtëzakonshme. Kur bëhet nga një ekspert apo grup ekspertësh në Shqipëri, dhe mund të bëhet, ka teknologij, të vijnë ta bëjnë në Zvicër, në Amerikë, ta bëjnë në Londër, ta bëjnë në Izrael, ta bëjnë ku të duan aktin e ekspertimit, por ta bëjnë”, thotë motra e Fatmir Hoxhajt.
Ahmet Toska u vra më 26 Tetor 2020 herët në mëngjes në lagjen “Sheq i Madh” të Fierit.
Në fillimit të Nëntorit 2020, policia ndaloi Fatmir Hoxhajn si të dyshuar, sapo ky i fundit u kthye nga Italia në Shqipëri dhe prej tre vitesh ndodhet në burg. Banesa e tij është në të njëjtën lagje, por Fatmir Hoxha jeton prej vitesh në Itali së bashku me familjen.
