Ngjarja e momentit në klubin e Partizanit është e ardhmja e Zoran Zekiçit.
Trajneri kroat ka një ofertë të mirë nga klubi i Osijekut, qytetit të lindjes, ku ka kaluar periudhën më të mirë dhe më të gjatë në karrierë si trajner.
Megjithatë, në kampin e kuq nuk duken shumë të shqetësuar rreth kësaj çështjeje, pasi është kontrata që mban të lidhura palët, pavarësisht një dëshire të trajnerit për t’u kthyer në vendlindje.
Deri sot, klubi i kuq nuk ka reaguar në mënyrë publike rreth thashethemeve për Zekiçin, por “Panorama Sport” ka arritur të marrë një reagim zyrtar në lidhje me ato çfarë shkruhen rreth së ardhmes së trajnerit kroat. Ideja është e qartë, Zekiç ka një kontratë dhe duhet ta respektojë.
“Partizani është një klub i madh, një markë në futbollin shqiptar dhe domosdoshmërish lojtarët, por edhe stafi teknik mund të jenë në radarët e klubeve të tjera. Ky është një tregues i qartë i ecurisë në rritje dhe fakt që puna po shkon mirë. Por përderisa palët janë në kontratë dhe vullneti është për të vazhduar, nuk ka asnjë çështje për t’u diskutuar”, është reagimi i klubit të Partizanit, i përcjellë nga zyra e shtypit.
Ky është një sinjal i qartë se klubi e vlerëson trajnerin kroat dhe nuk ka ndërmend të heqë dorë kaq lehtë dhe kaq shpejt prej tij.
Si gjithnjë, para vendimeve zyrtare ndodhin prapaskena, ku palët diskutojnë apo negociojnë dhe kështu ka ndodhur edhe në rastin e Zekiçit.
Siç raportuan mediat kroate, trajneri në ditët e fundit ka pasur kontakte me klubin e Osijekut, ku edhe ka marrë një ofertë mjaft joshëse.
Duke pasur të qartë në mendje kontratën që ka firmosur me Partizanin, trajneri ka vendosur që të negociojë një largim të mundshëm, pa “luftë”, duke kërkuar njëfarë dashamirësie nga ana e presidentit Gazment Demi.
Kështu, dyshja kanë zhvilluar një takim kokë më kokë. Trajneri i ka treguar “pa doreza” situatën me Osijekun, me Demin, që pasi e ka “pleqëruar” në mendjen e tij, e ka refuzuar mundësinë e ndërprerjes së kontratës.
Argumentet e presidentit në drejtim të Zekiçit kanë qenë të bazuara në faktin se klubi këmbënguli dhe investoi për ta sjellë në Tiranë, si dhe merkatoja është ndërtuar në pjesën më të madhe mbi dëshirat e strategut kroat.
Kështu, lënia kaq shpejt e një projekti të saponisur nuk është parë si e duhur nga presidenti. Pas kësaj bisede, gjithçka është mbyllur aty dhe asgjë nuk ka vazhduar, me trajnerin, që të paktën për momentin, vijon punën.
