Vila e Milan Radojiçiç në Ujman dhe një tjetër banesë e tij është bastisur këtë të premte nga autoritetet e Kosovës, në kuadër të hetimeve për sulmin ndaj policisë në Banjskë.
Milan Radojiçiç cilësohet nga autoritetet si kreu i grupit që ndërmori sulmin e armatosur të dielën e kaluar, nga i cili mbeti i vrarë një efektiv i policisë së Kosovës dhe u plagosën disa të tjerë. Akuzat Milan Radojiçiç i ka pranuar vetëm ditën e sotme përmes një deklarate të avokatit të tij. “Po i njoftoj të gjithë persekutorët vigjilentë të popullit serb, prej Kurtit e te ndihmësit e tij të shumtë të huaj, se unë personalisht i kam bërë të gjitha përgatitjet logjistike për mbrojtjen e popullit tonë kundër pushtuesit dhe ky akt i imi nuk ka asnjë karakter apo qëllim tjetër, dhe nuk ka të bëjë fare me të kaluarën time”, ka thënë ai, duke iu referuar kryeministrit të Kosovës, Albin Kurti.
Po këtë të premte, ministri i Brendshëm i Kosovës, Xhelal Sveçla ka publikuar pamje nga vila dhe banesa e Radojiçiç, që iu nënshtruan kontrolleve.
Teksa vë theksin te luksi i rezidencave, Xhelal Sveçla shprehet se Radojiçiç nuk është “nuk bëhet fjalë për asnjë ‘luftëtar lirie’ por për një Pablo Escobar të rajonit”.
“Nën maskën e mbrojtësit të qytetarëve ai dhe bashkëpunëtorët e tij u bënë multi milionerë në kurriz të ligjit, shtetit dhe qytetarëve të tjerë. Prandaj, është e domosdoshme që vatra e krimit e gjithë këtyre viteve në veri të vendit të hetohet së bashku me të gjithë asetet, aparaturën dhe lokacionet e grupit terrorist”, shton Svelça.
Më herët gjatë ditës, Presidenti i Serbisë Aleksandër Vuçiç njoftoi se Milan Radoiçiç është dorëhequr nga posti i nënkryetarit të Listës Serbe. “Radoiçiç nuk dëshiron ta dëmtojë më tej Listën Serbe”, tha Vuçiç në një prononcim mediatk.
