Nga Boldnews.al
Në korrik të këtij viti, Edi Rama i shoqëruar nga ministrja e Infrastrukturës dhe njëherësh zëvendësja e tij, Belinda Balluku, vizituan dy kantiere rruge; Orikum – Dukat dhe Palasë – Dhërmi. Të ulur në sediljen e pasme të një automjeti kabriolet, Rama dhe Balluku thanë se këto dy akse janë drejt fundit, me kontrata tenderuese të bëra nga Autoriteti Rrugor Shqiptar.
Por, vetëm disa muaj pas këtij premtimi që rruga “Palasë-Dhërmi do të bëhet për 7 minuta”, Autoriteti Rrugor Shqiptar po hap një tjetër procedurë tenderuese. Nuk bën fjalë për fillimin e punimeve, por për një “bonus” të majmë për firmën fituese, “Gjikuria”. Kësaj të fundit nuk i kanë mjaftuar 15 milionë eurot e fituara në vitin 2020, teksa ka kërkuar një shtesë fondi prej 3 milionë eurosh. Një paradoks i madh, pasi me kaq para mund të ndërtoheshin rrugë të tjera, por që krerët e qeverisë do ia japin “shpërblim” një prej firmave më të përfolura për punime dhe zaptime pronash në Jug të Shqipërisë.
Dokumenti i mësipërm është hapja e procedurës tenderuese për “ndërtim rruge Palasë-Dhërmi”. Siç lexohet, bëhet fjalë për një procedure të hapur nga Autoriteti Rrugor Shqiptar, me një fond prej 311.884.255 lekë, teksa paratë do t’i jepen afrofe firmës “Gjikuria”.
Mësohet se janë punime ndërtimi, ndërsa formalisht ARRSH-ja dhe drejtori i saj Evis Berberi do të plotësojnë dokumente, kur në fakt dihet se ku do të përfundojnë këto para. Nisur edhe nga vlera e këtij “tenderi”, mësohet se bëhet fjalë për një shtesë fondi që kap shifrën e 20% të vlerës së tenderit të parë. Pra, nëse 3 vite më parë “Gjikuria” mori 15 milionë, tashmë do të përfitojë edhe 3 të tjera. Por, a nuk e përuroi Rama dhe Balluku këtë vepër? Përse jepen para’ kur rruga ka përfunduar. Për çfarë do të përdoren këto fonde shtesë?
Tenderi i vitit 2020 u fitua nga “Gjikuria”, teksa fituesi kishte një ofertë prej 5 milionë eurosh më shumë sesa oferta më e vogël
Tenderi i ndërtimit të rrugës Palasë-Dhërmi është finalizuar në vitin 2020. Në procedurat e ARRSH-së kishte hije të forta dyshimi se gjithçka ishte paracaktuar, pasi oferta e fituesit (Gjikurisë) me ofertën më të ulët të (Gener 2) kishte një vlerë prej 5 milionë eurosh.
Një skandal i madh, por që u kalua si gjithë tenderët e dyshuar të tjerë, pasi “sa më shumë para në tender, aq më shumë edhe për zyrtarët”. Pra, vetëm ndërtimi i kësaj rruge i ka kushtuar plot 8 milionë euro më shumë arkave të shtetit shqiptar. Deri më tani, asnjë institucion kontrollues apo ligjzbatues nuk ka lajmëruar për nisjen e ndonjë procedure hetimi për Berberin e ARRSH-së, për “shoqëruesen” e Ramës apo edhe për të tjerë.
Firma “Gjikuria” është e njohur në atë zonë, teksa ka bashkëpunuar për ndërtime kompleksesh turistikë. Aq sa kohët e fundit, Edi Rama e ka shpallur edhe investitor strategjik për një pronë buzë Detit Jon.
