Eksperti i sigurisë, Ilir Kulla tha në emisionin Now në Euronews Albania se Serbia kishte përgatitur një plan për kryengritje të armatosur në të gjithë Kosovë që do të niste nga manastiret.
Sipas tij, gjithçka nisi kur serbët u larguan nga institucionet por ajo që ndodhi ishte që banorët serbë të veriut nuk i mbështetën terroristët
“Plani i tyre ka qenë që ata të bëjnë një kryengritje të armatosur në gjithë Kosovën, edhe brenda në Kosovë, Pejë, Deçan ku ka manastire dhe nëpërmjet destabilizimit të thoshin këtu ka dështuar gjithçka dhe duhet bërë gjithçka nga e para. Kjo nisi që kur u larguar nga pushteti lokal dhe të gjitha postet. por ajo që ka ndodhur këtë herë është që serbët e Kosovës nuk i kanë ndjekur, madje për herë të parë edhe kisha është distancuar publikisht përmes 3 deklaratave”, tha Kulla.
Ai tha se policia e Kosovës ka pasur kontroll mbi Veriun vetëm, gjatë qeverisjes së Albin Kurtin. Kulla tregoi se prej 23 vjetësh në veriun e Kosovës janë futur kontrabandë që nga armët deri te karburantet dhe hera e parë që policia e Kosovës ndërhyn për ta penguar këtë veprimtari të paligjshme është në qeverinë Kurti.
Sipas tij, nëse marrëveshja për targat për të cilën Kurti u kryqëzua do të implementohej, do ishte më e lehtë të mësohej se të kujt ishin dhjetëra makinat me armatime të sekuestruara në Veri dhe nga kanë ardhur.
“Të kujtohet kur u morën peng policët në veri? Tani më lind e drejta të them që nuk i ka marrë peng xhandarmëria po këta banditë. Polici që u vra para tri ditësh nuk ka qenë polic special, ka qenë polic patrulle. Këta banditë prej muajsh dhe vitesh kanë bërë në veri atë që kanë dashur duke e llogaritur një territor që do ta shkëpusin nga Kosova”, tha Kulla.
