Tre persona janë arrestuar dhe një tjetër është proceduar këtë të martë nga policia, pasi akuzohen për vepra të ndryshme penale.
Blutë bëjnë me dije se në pranga kanë rënë shtetasit me iniciale F. R., 41 vjeç, D. K., 35 vjeç, dhe I. B., 54 vjeç pasi akuzohen për dhunë dhe grabitje.
Ndërkohë procedimi ka nisur për shtetasin F.R. 17 vjeç.
“Specialistët për Hetimin e Krimeve të Komisariatit të Policisë Durrës arrestuan në flagrancë shtetasin F. R., 41 vjeç, banues në Sukth, Durrës, si dhe referuan materialet në Prokurori ku nisi procedimi në gjendje të lirë për djalin 17 vjeç të shtetasit F. R., pasi për motive të dobëta, kanë goditur me sende të forta, një 36-vjeçar.
Specialistët për Hetimin e Krimeve të Stacionit të Policisë Plazh arrestuan në flagrancë shtetasin D. K., 35 vjeç, banues në lagjen nr. 13, pasi ka vjedhur një shumë parash, në një biznes. Gjithashtu, 35-vjeçari kundërshtoi punonjësit e Policisë, gjatë shoqërimit.
Specialistët për Hetimin e Krimeve të Komisariatit të Policisë Shijak arrestuan në flagrancë shtetasin I. B., 54 vjeç, banues në Sukth, pasi ka vjedhur disa bateri automjetesh, në një magazinë”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm, Durrës për veprime të mëtejshme.
