Kandidati i PS Albert Halili kryeson zgjedhjet në Kukës me një diferencë prej 3 874 votash, 20 kuti nga fundi.
Sipas të dhënave nga KQZ, nga 54 qendra votimi të numëruara (74 në total), Albert Halili numëron 9 295 vota. Rivali i tij Emri Vata, nga koalicioni opozitar “Bashkë Fitojmë” ka 5 421 vota.
Kryeministri dhe kreu i PS, Edi Rama, përmes një postimi në “FB”, u shpreh se avantazhi tashmë është i “pakthyeshëm”.
Numërimi në Kukës nisi rreth 4 orë pas përfundimit të procesit të votimit (19:00 të së dielës). Në krahasim me 14 Majin kur u mbajtën zgjedhjet vendore, pjesëmarrja dje ishte më e ulët. Sipas të dhënave paraprake, kutive të votimit i janë drejtuar 19, 739 qytetarë (44,26%). Këtë herë kanë qenë 4 mijë votues më pak se më 14 Maj.
Procesi i votimit ishte përgjithësisht i qetë. Përfaqësues të koalicionit opozitar ‘Bashkë Fitojmë’ denoncuan gjatë paradites prezencën në disa qendra të votimit të përfaqësuesve të PS që sipas tyre, mbanin shënim zgjedhësit që shkonin për të votuar.
Momente tensioni pati para se të niste numërimi i votave në KZAZ, pasi disa vëzhgues të pa autorizuar nuk janë lejuar të qëndrojnë në ambientet e brendshme të qendrës. Për të qetësuar situatën ndërhynë efektivët e policisë, që lejuan qëndrimin vetëm të vëzhguesve të autorizuar nga KQZ.
Zgjedhjet në Bashkinë e Kukësit vijnë pas largimit të Safet Gjicit nga posti i kryebashkiakut, pas publikimit të video-skandalit duke kryer marrëdhënie seksuale në zyrë me Alma Kaçin. Aktualisht, Gjici ndodhet në burg, nën masën e sigurisë arrest me burg për akuzën e korrupsionit pasiv. Në videoskandal, pas konsumimit të marrëdhënies intime me Alma Kaçin (po ashtu e arrestuar për korrupsion aktiv), shihet Gjici i cili i premton asaj një tender për sterilizimin e qenëve të rrugës.
