Një efektive policier e patrullës në Komisariatin nr. 1 në Tiranë së bashku me kolegun e saj, kanë gjetur mbrëmjen e djeshme një armë zjarri, pistoletë “TT”, brenda automjetit të shërbimit të Policisë së Shtetit.
Burime bëjnë me dije se arma e zjarrit është gjetur rastësisht, teksa efektivja ka qenë duke kërkuar në automjet një send personal që i kishte humbur.
Mësohet se policët, në pjesën e poshtme të sediljes së pasagjerit kanë gjetur një çantë të zezë meshkujsh të mbuluar me pluhur, e cila mund të ketë qenë aty prej disa kohësh dhe pasi e hapën, brenda saj kanë gjetur një pistoletë TT. Arma është dërguar në Laboratorin e Policisë Shkencore për ekspertizë dhe shenja gishtash.
Dyshimet e para janë se arma mund të jetë lënë nga ndonjë person i shoqëruar që ka qenë i armatosur. Ai dyshohet se ka përfituar nga mungesa e vëmendjes së efektivëve dhe e ka fshehur, duke iu shmangur kështu edhe akuzës për “armëmbajtje pa leje”.
Hetimet po ndiqen edhe nga Agjencia e Mbikëqyrjes Policore, për shkak se arma është gjetur nga policë. Deri më tani nuk ka asnjë emër të dyshuar se kujt mund t’i përkasë arma e zjarrit.
