Personi që shihni në foton e mëposhtme, është Klered Bozhani, autori i dyshuar i plagosjes së policit të forcave speciale “Shqiponja” pasditen e kësaj të mërkure në kryeqytet.
Ngjarja ndodhi në lagjen “Kinostudio”, në rrugën “Hysen Xhura” ku efektivi Edlir Alleshi ishte pjesë e një patrulle të “Shqiponjave” që ishte vënë në ndjekje të Klered Bozhanit. Në një moment, ky i fundit ka hapur zjarr ndaj polici duke e qëlluar me dy plumba në bark.
Si pasojë efektivi i është nënshtruar një ndërhyrje kirurgjikale, dhe raportohet se është jashtë rrezikut për jetën.
“Në lagjen “Kinostudio”, në rrugën “Hysen Xhura”, shërbimet e Forcës së Posaçme “Shqiponja” pasi kanë marrë informacion për një person që qarkullonte me armë zjarri, janë vënë në ndjekje të personit të dyshuar.
Gjatë ndjekjes, personi i armatosur ka hapur zjarr në drejtim të Forcave “Shqiponja”, dhe si pasojë është plagosur një prej efektivëve, inspektor E. A., i cili është dërguar menjëherë në spital për ndihmë mjekësore.
Në ndjekje të personit të armatosur janë venë shërbimet e tjera të Forcave “Shqiponja”, Patrullat e Përgjithshme, dhe Njësitë Speciale Operacionale, janë bllokuar hyrje-daljet e të gjitha rrugëve, dhe vijon kontrolli për kapjen e personit të armatosur”,- njoftoi policia më herët.
