Kandidati i Partisë Socialiste për Bashkinë e Kukësit, Albert Halialj do të mbajë pasditen e nesërme takimin përmbyllës elektoral në orën 18:30 në sheshin “Skënderbej” të qytetit verilindor, për zgjedhjet që mbahen këtë të dielë, 24 shtator.
Por më shumë se sa një takim elektoral, ai do të jetë një koncert ku do të performojnë disa prej këngëytarëve më në zë të muzikës shqiptare si Valbona Mema, Anxhela Peristeri, Irma Libohova dhe Mirgen Zela.
Sipas “Qëndresës Qytetare, kandidati socialist është totalisht në shkelje të ligjit në këtë rast, pasi Kodi Zgjedhor, neni 78, pika 9 është i qartë në këtë drejtim duke ndaluar në mënyrë kategorike koncertet e organizuara nga dhe/ose për subjektet zgjedhore, pavarësisht burimit të financimit.
Në një postim në rrjetet sociale, “Qëndresa Qytetare” bën me dije se i ka bërë kërkesë Komisionit Qëndror të Zgjedhjeve për të marrë masa dhe ta ndalojë koncertin e nesërm si një “Aktivitet i Ndaluar”.
Reagimi:
Qëndresa Qytetare në funksion të punës së saj dhe për të kontribuar për zgjedhje të lira dhe me integritet e konsideron të paligjshëm koncertin e lajmëruar nga Partia Socialiste dhe kandidati për Bashkinë Kukës Albert Halilaj.
Kodi Zgjedhor, neni 78, pika 9 është i qartë në këtë drejtim duke ndaluar në mënyrë kategorike koncertet e organizuara nga dhe/ose për subjektet zgjedhore, pavarësisht burimit të financimit.
Per kete arsye, QQ ka njoftuar sot Komisionerin Shteteror te Zgjedhjeve, per te marre masa duke e ndaluar koncertin diten e neserme si një “Aktivitet i Ndaluar”.
Integriteti dhe standartet zgjedhore duhet të jenë kushte primare për të zhvilluar zgjedhje të lira, të ndershme dhe të pa ndikuara.
