Edhe pse ka kaluar gati 3 vjet nga pandemia e Covid-19, duket se beteja me këtë virus nuk ka përfunduar ende.
Me kthimin e virozave gjatë stinës së vjeshtës, janë rikthyer edhe simptomat e covid, e sidomos tek fëmijët.
Këtë fakt e pohon shefja e pediatrisë në Elbasan, e cila në një prononcim për mediat thekson se në 24 orë janë afro 90 fëmijë që marrin trajtim në spital, për shkak të virozave të stinës.
Por përpos virozave stinore, mjekja sqaron se një pjesë e mirë e fëmijëve kanë rezultuar pozitivë me Covid-19. E madje disa prej tyre janë shtruar në spital, pasi paraqesin simptoma më të rënda.
“Në pavion infektiv kemi edhe fëmije me covid, aktualisht kemi 12 fëmijë të shtruar. Gjendja e tyre paraqitet e mire nuk kemi asnjë rast të rënde të transferuar në Tiranë. Janë fëmijë me temperaturë dhe te vjella të cilët kërkojnë një mjekim spitalorë, 2 deri ne 3 dite dhe me pas gjendja e tyre përmirësohet”,- tha Irena Palloshi, shefe e pediatrisë Elbasan.
Në këtë situatë, mjekja pediatre ndan këshilla për prindërit se si duhet të veprojnë kur fëmijët e tyre shfaqin simptoma gripale, ndrë rsa ka theksuar se një kujdes të veçantë duhet t’i kushtohet higjienës personale të fëmijëve dhe higjienës së produkteve që ata konsumojnë çdo ditë.
“Në momentin që fëmija është me temperaturë dhe me shënja viroze prindi do bëj mirë të mos paraqitet ne kopsht apo shkollë që të mos jenë burim infeksioni. Por njëkohësisht prindërit duhet te bëjnë kujdes edhe nëse kanë një fëmijë në kopsht apo shkollë dhe kanë një bebushe ne shtëpi, të kenë kujdes që ky infeksion të mos i kalojë fëmijëve te tjerë”,- tha Irena Palloshi.
