Një 55-vjeçar është arrestuar ditën e sotme në Malësinë e Madhe, pasi akuzohet si autor i një plagosje me armë zjarri.
Në pranga ka rënë shtetasi me iniciale, GJ.M i cili pas një sherri për motive të dobëta ka plagosur me armë zjarri një 30 vjeçar.
Ndërkohë njoftohet gjithashtu se ka nisur procedimi për gruan e 55-vjeçarit pasi ka qënë e pranishme në sherr.
“Shërbimet e Policisë, pas njoftimit se në vendin e quajtur “Qafa e Bardelecit”, në fshatin Vermosh, Malësi e Madhe, ishte plagosur me armë zjarri një shtetas, kanë shkuar menjëherë në këtë adresë. Nga veprimet e para hetimore rezultoi se pas një konflikti për motive të dobëta, shtetasi Gj. M. kishte plagosur me armë zjarri pistoletë, në dorë, shtetasin M. P., 30 vjeç, i cili ndodhet jashtë rrezikut për jetën. Gjithashtu, shtetasi Gj. M. ka dëmtuar automjetin e shtetasit D. Q. dhe e ka kanosur atë, pasi i ka ofruar ndihmë shtetasit të plagosur.
Falë veprimeve të shpejta operacionale, pas disa minutash ndjekjeje, shërbimet e Policisë kanë kapur dhe vënë në pranga autorin e dyshuar, shtetasin Gj. M., 55 vjeç.
Në vijim të veprimeve, nisi procedimi në gjendje të lirë për bashkëshorten e shtetasit Gj. M., shtetasen E. M., pasi ka qenë prezente gjatë konfliktit dhe ka kanosur shtetasin D. Q”,- njofton Policia.
Materialet procedurale do t’i kalojnë Prokurorisë, për veprime të mëtejshme.
