Kryebashkiaku Erjon Veliaj është detyruar këtë të premte të marrë përsipër një akt të vështirë, në një moment të sikletshëm që lidhet me inceneratorin e Tiranës.
Në një kohë që SPAK ka sekuestruar pronën dhe po heton zyrtarët që u përfshinë në grabitjen e fondeve shtetërore, Veliaj kërkoi që Këshilli Bashkiak të kalojë 600 milion lekë pagesa të prapambetura për inceneratorin.
Të gjihtë këshilltarët e majtë e miratuan këtë akt pa bërë asnjë reagim, ndërkohë opozita reagoi ashpër.
Këshilltari i opozitës, Ilir Alimehmeti nga ana e tij u shpreh kritik për këtë mbledhje. Ai bëri me dije se inceneratorit është në sekuestro nga SPAK.
“Sot Këshilli Bashkiak i vendosi 6 mln euro të tjera në dispozicion inceneratorit që është në sekuestro. Nuk mund të ishim dakord”, tha Alimehmeti.
Kurse nënkryetari i Këshillit Bashkiak, Dorian Teliti tha se paratë e shkollave po shkojnë për një incenerator fantazmë.
“Në sallën e Këshillit Bashkiak, Veliaj shpërtheu në të bërtitura dhe fyerje ndaj këshilltarëve të opozitës që kundërshtuan pagesën qindra miliona lekë për inceneratorin që nuk ekziston. Këshilltarët e opozitës u pritën nga 30 policë. Kush mendon se mund të intimidojë këshilltarët e opozitës, gabon rëndë. Veliaj i hoqi të drejtën opozitës, mbajti ligjëratën mashtruese dhe u largua,” tha Teliti.
“Janë 600 milionë lekë të reja, janë 6 milionë euro që merren nga paratë e shkollave dhe kopshteve dhe çohen për të paguar inceneratorin fantazmë,” tha ai.
“Kemi dyshime të forta se prona publike e Gardës së Republikës i jepet në formati klientelist, një përfaqësuesi të lartë të PS,” theksoi Teliti.
- Çfarë ndodhi në Këshillin Bashkiak dhe përplaset me opozitën
600 milion lekë të tjera që Erjon Veliaj është detyruar t’i paguajë për inceneratorin e Tiranës e kanë vënë kryebashkiakun në një pozitë të vështirë përballë këshilltarëve të opozitës.
I mësuar me sallën e mbushur vetëm me këshilltarë socialistë, Veliaj është acaruar nga thirrjet “zoti Qelia” që iu drejtua këshilltari i PL, Tedi Blushi, apo kërkesat për të marrë fjalën të këshilltarit të PD-së, Dorian Teliti.
Blushi, theksoi se sot Veliaj i ka sjellë Këshillit Bashkiak për miratim propozimin për shtese fondesh për inceneratorin inekzistent dhe nën sekuestro të Tiranës.
“Erion Qelia ti sot i sjell Këshillit Bashkiak për miratim propozimin për shtese fondesh për inceneratorin inekzistent dhe nën sekuestro të Tiranës. Në vend të ishe sot i pandehur para drejtësisë vjen bën monologë para këshillit. Je keqbërësi më i madh i kryeqytetit dhe abuzuesi më i madh i taksave të qytetarëve. Për mega-aferën e inceneratorit duhet të ishe marre i pandehur.
Ti sot quhesh ‘Erion Qelia’. ‘Erion Qelia’ flet për humanizmin ndërkohë që refuzon në shkelje të ligjit dhe rregullores së këshillit kërkesën për lejimin në mbledhje të Kryetarit të Shoqatës së Para dhe Tetraplegjikëve. ‘Erion Qelia’ nga frika e përballjes me qytetaret dhe me transparencën e ka mbushur sallën me badigardët e tij dhe nuk lejon invalidët në karrocë dhe gazetarët që presin jashtë dyerve të bashkisë.
Ti ‘Erion Qelia’ duhet të merresh i pandehur dhe të dalësh para drejtësisë! Mega-Firma e paligjshme që ndryshoi fatin dhe i dha jetë kësaj vepre korruptive të inceneratorit të Tiranës, është e juaja pa mbledhur Këshillin Bashkiak dhe duke shkelur ligjin e pushtetit lokal Me këtë firmë të paligjshme, ti ‘Erion Qelia’ fute në borxh të gjithë qytetarët e Tiranës për 30 vite në shërbim të mafias së inceneratorëve. ‘Erion Qelia’ dili “për zot” firmës!”, tha Blushi.
Si justifikim për pagesën e radhës për inceneratorin që nuk ekziston, Veliaj solli shembullin e pagesës që ka bërë kryebashkiaku i Kavajës, i zgjedhur nga opozita.
“Shkuat me brekë dhe me tanga në gusht për të paguar” iu kthye Veliaj këshilltarëve të opozitës, para se të largohej duke braktisur debatin.
600 milion lekë që do të paguhen për inceneratorin e Tiranës janë një faturë që Veliaj detyrohet ta paguajë pasi është braktisur nga qeveria.
“Erion Qelia”/ Para shtesë për inceneratorin, “plas” sherri me Veliajn në Këshillin Bashkiak
