Prokuroria e Tiranës ka kërkuar riekspertimin mjekësor për kushërinjtë Bilbil dhe Jashar Maja, të dhunuar barbarisht në korrik të këtij viti nga anëtarët e fisit Rraja.
Në bazë të këtij urdhri, do të jenë 3 ekspertë të tjerë mjeko-ligjorë që do të kryejnë aktin e ri të ekspertimit.
Aktekspertimi i parë i kryer nga mjeku Elton Serani nuk u pranua nga dy kushërinjtë e dhunuar. Dhuna barbare e ushtruar ndaj tyre u cilësua plagosje e lehtë, ç’ka solli edhe lehtësimin e akuzës për nëntë personat e akuzuar dhe çuarjen e hetimit penal drejt pushimit.
Në aktekspertimin e parë, ekspertit mjeko-ligjor Elton Serani, kishte deklaruar se kushërinjve Maja nuk iu rreziku jeta nga dhuna e pësuar, pavarësisht frakturave të shumta në kokë dhe trup. Të lënduarit ndërkohë shprehen se ende kanë probleme shëndetësore.
Ky ekspertim solli reagime të shumta dhe kundërshti në opinionin publik, që u perceptua gjerësisht si amnistia e radhës që Rrajave po u bëhej nga organet ligjzbatuese.
Anëtarë të fisit Rraja goditën me sende të forta dhe kërcënuan me armë Bilbil dhe Jashar Majën, pasi këta të fundit kishin denoncuar në polici se aktiviteti shpërthyer i gurores në pronësi të një prej anëtarëve të fisit Rraja u kishte shkaktuar dëme në banesa.
Një video e publikuar në rrjete sociale dhe media, që dukej se ishte filmuar nga një prej pjesëtarëve të grupit dhunues, tregoi se si vëllai, djali dhe të afërm të tjerë të deputetit të PS-së Rrahman Rraja dhunuan brutalisht me shkop bejsbolli dhe kërcënuan me pistoletë dy kushërinjtë.
Ngjarja shkaktoi indinjatë në opinionin publik. Rrahman Rraja dha dorëheqjen si deputet pas publikimit të pamjeve, ndërsa ministri i Brendshëm Bledi Çuçi u shkarkua nga kryeministri Edi Rama për tu zëvendësuar me Taulant Ballën.
Kushërinjtë e dhunuar hodhën akuza ndaj policisë se po amnistonte Rrajat me veprimet e vonuara, që faktohen nga vetë njoftimet publike të policisë lidhur me ngjarjen. Shoqërimi dhe më pas lirimi i një prej vëllezërve të Rraham Rrajës apo shpallja në kërkim e djalit të tij disa orë pas publikimit të pamjeve, ngritën dyshime për sjelljen e njëanshme të policisë në favor të dhunuesve. Asnjë prej të dyve nuk është arritur të ndalohet ende nga policia.
