Policisë duket se i është dashur rreth 10 orë që të identifikojë se mes personave që dhunuan në mënyrë shtazore dy kushërinjtë Bilbil dhe Jashar Maja në Fushë-Krujë një ditë më parë ishte edhe Rrexhep Rraja, djali i deputetit të PS-së Rrahman Rraja.
Kjo është diferenca kohore mes momentit kur në media u publikuan pamjet e dhunës dhe njoftimit të policisë për shpalljen në kërkim të Rrexhep Rrajës.
Në video duket se si një duzinë personash, mes tyre familjarë dhe të afërm të deputetit të PS-së, goditën më sende të forta dy personat që kishin denoncuar më herët në polici dëmtimet që kishin shkaktuar në banesat e tyre veprimtaria shpërthyese në guroren e një prej anëtarëve të fisit Rraja.
Në një njoftim për mediat këtë mbrëmje (21:14), policia thotë se “në vijim të veprimeve hetimore është identifikuar dhe shtetasi R.Rr. (Rrexhep Rraja), për të cilin janë dërguar materialet pranë Prokurorisë së Gjykatës së Shkallës së Parë të Juridiksionit të Përgjithshëm Tiranë. Shtetasi R.Rr., është shpallur në kërkim policor dhe vijon puna nga shërbimet e Policisë, për lokalizimin dhe kapjen e tij. Vazhdon puna për identifikimin e personave të tjerë të përfshirë në këtë ngjarje”.
Para reagimit të policisë, media raportoi se personi me bluzë të zezë që godet brutalisht me shkop bejsbolli të dëmtuarin ishte pikërisht djali i deputetit të Partisë Socialiste Rrahman Rraja.
Rrexhep Rraja bëri bujë me rastin “Xhisiela” në vitin 2018, kur u arrestua pas kallëzimit të së dashurës për dhunë. Megjithatë, ndenji pak në qeli pasi Gjykata e Krujës e dënoi me shërbim prove.
Më herët, policia që nga të dhunuarit është akuzuar se ka vepruar me vonesë për shkak të tutjes nga Rrajat me lidhje me pushtetin, tha se kishte ndaluar katër persona (Ineid Rraja 23 vjeç, Eni Kullaj, 27 vjeç, Kujtim Përdaku, 57 vjeç Andi Rraja, 28 vjeç) dhe shpallur në kërkim tre të tjerë.
Mes dhunuesve janë dy vëllezërit e deputetit socialist Rrahman Rraja, konkretisht Flamur dhe Xhelal Rraja, të cilët janë të lirë ashtu si Rrexhep Rraja. Një ditë më parë, policia njoftoi shoqërimin e Xhelal Rrajës pas ngjarjes, por më pas e la të lirë. Pas publikimit të pamjeve e shpalli në kërkim dhe bashkë me të vëllanë që shquhet në video me pistoletë në dorë, si dhe një tjetër pjesëtar të fisit.
Rrethana këto që ashtu si pesë vite më parë kur ish-efektivi i policisë Emiljano Nuhu do të dëshmonte kapjen e insticioneve nga Rrajat, tregojnë se asgjë nuk ka ndryshuar në Fushë-Krujë, ku Rrajat sillen si ta kenë çifligun e tyre.
