Kanë përfunduar të gjitha sfidat e mbrëmjes të vlefshme për kualifikueset e Europianit “Gjermani 2024”.
Kombëtaret “big”, si Italia, Spanja, Belgjika nuk kanë zhgënjyer duke triumfuar.
Davide Frattesi me dy gola të shënuar në pjesën e parë i dhuron fitoren jetike Italisë në ndeshjen e katërt të grupit eleminator të Euro 2024 kundër Ukrainës duke i rrëmbyer ekipit të verdhë edhe vendin e dytë në grup që tashmë e ndajnë bashkë me pikë të barabarta, 7.
Në stadiumin “San Siro”, Italia e re e Spalletit krijoi shumë, sidomos gjatë pjesës së dytë të ndeshjes ndërsa Ukraina u fik me kalimin e minutave edhe pse goli i Yarmolenko e mbajti në lojë deri në fund. Gjithsesi situata në grupin C mbetet shumë e komplikuar pasi edhe Maqedonia e Veriut është ngjitur në kuotën e 7 pikëve pas suksesit 2-0 në Maltë.
Në grupin F, Belgjika kryesuese me 13 pikë mundi pastër 5-0 Estoninë. Austria ia del në Suedi me shifrat 1-3 duke barazuar me pikë belgët. Në grupin A, goleadë e Spanjës 6-0 në shtëpi ndaj Qipros. Golat mbajnë firmat e Gavi, Merino, Joselu, Baena dhe Torres (x2).
Edhe Xhaka me Shaqiri iu kundërpërgjigjën kritikave pas barazimit me Kosovën. Zvicra mposhti 3-0 Andorrën me golat e Itten, Granit Xhakës dhe Xherdan Shaqirit.
