Pano Soko, ekspert ekonomie dhe përfaqësues i partisë “Nisma Thurje” që denoncoi koncesionin e sterilizimit në SPAK, tha në emisionin “Të Paekspozuarit” se nesër do të denoncojë në SPAK aferën e fondeve të IPARD për bujqësinë që nuk iu dhanë fermerëve, por të afërmve të pushtetit.
Ndër të tjera, Soko tha dhe se kryeministri Rama ka qenë në dijeni të të dhënave të falsifikuara që u bënë me koncesionin e sterilizimit për operacionet që bëheshin.
“Nesër ne kemi një denoncim të radhës në SPAK, në 11.30 dhe ftoj mediat që të jenë prezentë, për një aferë po kaq të madhe, fondet e IPARD që ishin të destinuara për fermerët, por që kanë përfunduar në xhepat e njerëzve të afërt të politikës dhe pushtetit.
Sa i përket sterilizimit, u mor një qendër që ishte bërë me 1 milion euro borxh. Çfarë bëri vendimi i Këshillit të Ministrave? Qendra e sterilizimit iu dha koncesionarit privat dghe koncesionari na tarifonte ne, deri 300 euro në varësi të madhësisë së seteve kirurgjikale. Njëlloj sikur unë të kem një shtëpi tia jap Yllit dhe Ylli të më thotë mua hajde rri me qira, pra t’i paguaj qira për shtëpinë time.
Nëse do të blinim pajisje të reja kirurgjikale do të kushtonte 11 milionë euro në vit në bazë të studimit të bërë nga Ministria. E di sa shkon sterilizimi i pajisjeve të vjetra? Ka shkuar 16 milionë euro në vit.
Në studimin e fizibilitetit që i është bërë kësaj çështjeje është thënë që numri i operacioneve shkon në 50 mijë, është ulur kastile, me të dhëna të falsifikuara dhe Rama i ka këto të dhëna. Ndërkohë që realiteti ka qenë 63 mijë operacione mesatarisht në vit dhe ka arritur deri 90 mijë operacione në vit. Në 2018 ministria u tha mjekëve ulni numrin e operacioneve se vajti fatura shumë lart dhe kryeministri e di këtë”-tha Soko.
