Ish-kryeministri Sali Berisha ka përcjellë këtë të premte një denoncim të qytetarëve të Tiranës.
Përmes një postimi me video në “FB”, Berisha publikon mesazhin denoncues që thotë se një kompani ndërtimi pas së cilës qëndron Mariglen Qato, kryeinspektori Ndërtimor i Bashkisë së Tiranë, ka shembur rrugën “Sali Nivica”.
Sipas denoncimit, fakti është kallëzuar edhe në polici, por s’ka pasur ende asnjë reagim.
“Kompania e Mariglen Qatos, drejtorit gangster të policisë së Bashkisë dhe miku i Erion Veliaj, iu shembi rrugën banorëve! Askush nuk pyet për ta”, shkruan Berisha në rrjetin social, ndërsa më tej publikon mesazhin e ardhur në adresë të tij.
Në të shkruhet:
Pershendetje doktor. Dua tju tregoj jue nepermjet jush te gjithe shqiptareve se cfare ndodh ne Tiranen e Lali Eri hajdutit e sesi veprohet me dy standarte. Kompania Vas construction ka shembur rrugen Sali Nivica pas pallatit 14/3 tek njesia nr 2 eshte denoncuar ne policine e rendit dhe ne policine Bashkiake dhe deri sot rruga eshte e shembur se shteti eshte kapur. Kompania eshte e hajdutit Mariglen Qato. Kemi njoftuar qe ne janar Plicine te nr 112 dhe asnje mase.
Në muajin Maj, zyrtari i lartë i Bashkisë së Tiranës të drejtuar nga Veliaj është kallëzuar në SPAK nga PD. Sipas kësaj force politike, Qato ka përfituar miliona euro nga 29 tendera që lidhen personalisht me të në kohën kur drejtonte UKT-në dhe me familjarët e tij, përmes kompanisë “5D”, që sipas PD, është “de facto” në pronësi të tij. Po ashtu, PD, njerëz të afërt të Mariglen Qatos janë emëruar në postë të rëndësishme në administratën e Bashkisë së Tiranës, duke e akuzuar kreun e INUV për nepotizëm.
‘Lufta’ e qeverisë për ndërtimet pa leje disa muaj më parë, zbuloi se si kreu i INUV-it kishte lejuar paligjshmërinë. Dy vite më parë, ai pati probleme me drejtësinë pikërisht për lejimin e ndërtimeve pa leje. Nën akuzën e “Shpërdorimit të detyrës”, prokuroria kërkoi ndaj tij masën e arrestit, që u rrëzua nga gjykata.
Emri i Qatos u lakua në media edhe një vit më parë, kur shoferi i tij u arrestua për trafik kokaine.
