Të paktën 15 persona kanë vdekur dhe shumë të tjerë janë raportuar të zhdukur pas përmbytjeve të rënda në Greqi, Turqi dhe Bullgari, duke shkatërruar ndërtesa dhe ura, dhe duke i kthyer rrugët kryesore në lumenj balte, sipas “The Washington Post”.
Më shumë se 800 ekipe të shpëtimit janë angazhuar në terren.
Në Greqinë qendrore, u regjistruan reshje shiu me intensitet të lartë në një nivel rekord dhe më shumë se dyfishi i reshjeve tipike vjetore.
Përmbytjet lidhen me ndryshimet e motit, që kanë shkaktuar reshje dhe nxehtësi ekstreme diku tjetër në Evropë, këtë javë, pas një valë zjarresh vdekjeprurëse të verës, në Greqi.
Shkencëtarët thonë se ndryshimi i klimës po rrit rrezikun e reshjeve të tepërta që shkaktojnë përmbytje, nxehtësi ekstreme dhe zjarre.
“Associated Press” raportoi të paktën 15 vdekje dhe shtatë të zhdukur në Greqi, Turqi dhe Bullgari që nga mëngjesi i së enjtes:
Shtatë vdekje u raportuan në Turqi, pesë persona vdiqën pas një përmbytjeje të menjëhershme në një kamping, në Turqinë veriperëndimore dhe dy të tjerë vdiqën në Stamboll mes përmbytjeve të furishme.
Katër vdekje u raportuan në Greqi pranë qytetit port të Volos dhe Kardtsas, në perëndim, dhe shumë të tjerë u raportuan të zhdukur.
Katër të vdekur u raportuan në Bullgari.
Përmbytjet në Greqi u përqendruan në rajonet jugore dhe lindore, duke përfshirë Athinën, Volosin dhe Karditsanin.
Shërbimi i Menaxhimit të Emergjencave “Copernicus” i Bashkimit Evropian postoi në Twitter se në Greqi ishin përmbytur 18,392 hektarë tokë.
Në Turqi, në Stamboll shiu ra për gati një orë, duke përmbytur ndërtesat dhe zhytur automjetet.
Përmbytjet në Bullgari ndodhën në bregun juglindor të Detit të Zi, duke përfshirë qytetin turistik të Tsarevos, ku thuhet se u shkatërruan disa ura.
Përmbytjet përfshinë edhe Roviesin, një fshat në ishullin grek të Evias, ndërsa pritet që situata të lehtësohet pasi stuhia po largohet drejt jugut.
Më herët, sinoptikanët parashikuan reshje të dendura në disa pjesë të Greqisë, e cila do të goditej nga stuhia “Daniel”.
“Stuhia dhe shiu i dendur janë të lidhura me një lloj sistemi të motit të ngecur, të quajtur “model bllokues”, të cilin ndryshimet klimatike të shkaktuara nga njerëzit mund ta bëjnë më të zakonshëm”, sipas disa kërkimeve.
I njëjti ndryshim moti shkaktoi gjithashtu përmbytje të rënda në Spanjë, fundjavën e kaluar, i cili do të jetë përgjegjës për nxehtësinë në nivele rekord në Evropën Perëndimore, këtë javë.
