Gjykata e Posaçme ka urdhëruar SPAK që të kryejë hetim pasuror ndaj ish-ministrit të Shëndetësisë Ilir Beqaj. Referuar vendimit për dosjen e sterilizimit, gjykata kërkon nga prokuroria hetime të thelluara ndaj Beqajt për të kuptuar se pse është favorizuar kompania “Sani Service” në fitimin e koncensionit të sterilizimit.
Hetim që deri më tani nuk është kryer nga Prokuroria e Posaçme, ka konstatuar gjykata, që vlerëson se hetimi i SPAK është jo i plotë.
GJKKO kërkon që të sqarohet arsyeja se pse është favorizuar kompania fituesve: për shkak të lidhjeve shoqërore të ish-ministrit Beqaj dhe zëvendësit të tij Rrjepaj me përfituesit e koncesionit apo është marrë ryshfet.
“… Gjykata çmon se ka inidcje të mjaftueshme që prokuroria e Posaçme kundër Korrupsionit dhe Krimit të Organizuar të kryejë veprime, hetime dhe për veprat penale ‘Korrupsion aktiv i funskionarëve të lartë shtetëror ose i të zgjedhurve vendorë’, ‘korrupsion pasiv i funskionaëve të lartë shtetëror ose i të zgjedhurve vendorë’ dhe ‘Pastrimi i produkteve të veprës penale apo i veprimatrisë kriminale’ të parashikuara nga nenet 245, 260 dhe neni 287, gërmat (a) dhe (b) të Kodit Penal e kryer në rrethanën cilësuese ‘në bashkëpunim’ sipas nenit 287, paragrafi (2) iKodit Penal. Për këtë arsye, nga ana e prokurorisë duhet të bëhet një hetim i plotë dhe i gjithanshëm në këtë drejtim, fakt i cili nuk rezulton nga fashikulli hetimor”, konstaton GJKKO.
Referuar të njëjtit vendim, “kjo do të provojë nëse e gjithë veprimtaria e paramenduar kriminale e planifikuar në detaje nga personat nën hetim, është bërë thjesht për shkak të marrëdhënieve të ngushta shoqërore të personit nën hetim Ilir Rrapaj me personin në hetim Klodian Rjepahj, si dhe për shkak të njohjeve personale të këtij shtetasi me dhe shtetasit italian Umbro Staccini me ish-ministrin e Shëndetësisë Ilir Beqaj apo është rrjedhojë e një përfitimi të parregullt nga korrupsioni i zyrtarëve që kanë marrë pjesë në këtë procedurë”.
“Për këtë, thuhet në vendim, nevojitet një hetim pasuror”.
