Pas rikthimit të tij në krye të Partisë Demokratike së vulë, Lulzim Basha ka thirrur mbledhjen e Kuvendit Kombëtar. Në këtë mbledhje pritet të votohen ndryshimet statutore dhe Këshilli i ri Kombëtar.
Këto ndryshime pritet që t’i hapin rrugë spastrimeve nga Basha – ndryshimit të kupolës drejtuese, Kryesinë e re, edhe përfshirë Kreun e Grupit Parlamentar, që sipas statutit, zgjidhet në mesin e nënkryetarëve të partisë.
Me ndryshimet e reja, përcaktohet se kryetari mund të zgjedhë dhe nënkryetarin. Më këto ndryshime, Lulzim Basha pritet të jetë edhe kryetari i Grupit parlamentar, post që e mbante Gazment Bardhi.
Në statutin e ri, nuk ka asnjë pikë që e detyron Bashën që të japë dorëheqje nëse humb zgjedhjet.
Mbledhja do të nisë me disa fjalime të të rinjve për të vijuar me fjalimin e Bashës, për të ardhmen e partisë, më pas do të prezantohen ndryshimet statutore e në fund do të nisë votimi për propozimet e bëra.
Lulzim Basha ka zgjedhur që të mbledhë Kuvendin Kombëtar të Partisë Demokratike në pallatin e Sportit “Asllan Rusi”. Si për t’iu shmangur debatit të shifrave se sa pjesëmarrës ka pasur, Basha, nuk zgjodhi që të zhvillojë mbledhjen në Pallatin e Kongreseve ashtu si kurse ka ndodhur në krye të herës.
Ky Kuvend, duket se do të vulosë përçarjen e Partisë Demokratike. Teksa Berisha dhe Gazment Bardhi kanë dhënë sinjale për një ribashkim, Basha me më pak mbështetje vijon të mbajë vulën e partisë.
