I ngarkuari me punë i ambasadës amerikane në Tiranë, H. Martin McDowell ka zhvilluar ditën e sotme një takim me ministrin e Brendshëm Taulant Balla.
Takimi është bërë me dije nga vetë ambasada amerikane përmes një postimi në rrjetet sociale, ku thuhet se diplomati amerikan i ka vënë në dukje Ballës shqetësimet e ShBA-ve në lidhje me ndërhyjen tek sistemi TIMS në Policinë e Shtetit.
H. Martin McDowell bën apel për një hetim të shpejtë dhe të gjithanshëm dhe ka theksuar rëndësinë që ka mbrojtja e të dhënave vetjake/sensitive, përfshi edhe të qytetarëve amerikanë në Shqipëri. Gjithashtu, ai ka shprehur edhe gatishmërinë e SHBA-ve për mbështetje në këto hetime.
“I Ngarkuari me Punë i Ambasadës në Tiranë, H. Martin McDowell u takua sot me Ministrin e Brendshëm Taulant Balla. Ata diskutuan bashkëpunimin SHBA-Shqipëri në fushën e zbatimit të ligjit dhe mbështetjen për një sërë çështjesh të lidhura me sigurinë. I ngarkuari me Punë McDowell vuri në dukje shqetësimet e SHBA në lidhje me ndërhyrjen e raportuar në sistemet TIMS në Policinë e Shtetit. Ai nxiti një hetim të shpejtë dhe të gjithanshëm dhe theksoi rëndësinë që ka mbrojtja e të dhënave vetjake/sensitive, përfshi edhe të qytetarëve amerikanë në Shqipëri. McDowell i tha gjithashtu Ministrit Balla se Shtetet e Bashkuara janë të gatshme ta mbështesin Ministrinë dhe Policinë e Shtetit në hetimin e tyre.” thuhet në postimin e ambasadës amerikane në rrjetet sociale.
Fillimisht, vjedhja e të dhënave të sistemit TIMS në Policinë e Shtetit u raportua nga gazetari Ferdinand Dervishi, ku këtë herë nuk ishin iranianët që kishin ndërhyrë në sistem, por vetë zyrtarë e Policisë. Vjedhja u denoncua nga një tjetër drejtues policie, i cili dërgoi një e mail për mediat.
Më pas, vjedhjen e të dhënave të sistemit të TIMS në Policinë e Shtetit ishte kryer nga drejtori i Departamentit të Teknologjisë së Informacionit, Ervin Muça, qëmë pas u pezullua nga puna. Ai eksportoi të gjithë bazën e të dhënave të TIMS në një harddisk të jashtëm.
Sipas PD-së, Ervin Muça, për të kryer këtë akt ka përdorur punonjës të dy kompanive private të IT Soft & Solution të Ermal Beqirit, dhe kompaninë “Horizon”, të cilët kishin shkuar gjatë orarit të mbasdites pranë laboratorit të DTI-së, në rrugën “Mine Peza” dhe kishin kryer eksportin e të dhënave. Sipas PD-së, databazen e të dhënave te sistemit TIMS e kanë eksportuar në Qipro dhe se gjatë eksportit kanë qenë të pranishëm nga DTI e Policisë, Albana Vrapi nga Sektori i databazës, Enkli Hoxha nga Sektori i serverave, Egis Hidri nga Sektori i Serverave, Xhulja Çollaku nga Sektori i Serverave, Elvis Hysi nga Sektori i Serverave.
