Zgjedhjet e reja lokale për kreun e Bashkisë së Kukësit do të mbahen më 24 shtator.
Data është caktuar ditën e sotme nga Presidenti i Republikës, Bajram Begaj, i cili ka shpallur dekretin nr. 186 datë 11.08.2023 për “ Caktimin e datës së zgjedhjeve për Kryetar të Bashkisë Kukës”.
Kukësi mbeti pa kryebashkiak pas dorëheqjes së Safet Gjicit pas zgjedhjeve të 14 Majit, ku iu publikua një video skandal në zyrën e tij.
Gjici u rizgjodh më 14 maj, por dha dorëheqjen më 16 qershor dhe po atë ditë u shkarkua nga Këshilli i Ministrave, pasi në internet qarkulloi një video e tij duke kryer marrëdhënie seksuale me 31-vjeçaren Alma Kaçi në zyrë dhe u arrestua pak ditë më vonë për “korrupsion pasiv”.
Në video-skandalin e publikuar në media, pas aktit seksual, Safet Gjici dhe Alma Kaçi diskutonin që kjo e fundit të merte nga Bashkia e Kukësit projektin për trajtimin dhe sterilizimin e qenëve endacakë. Në reagimet e tyre, si Alma Kaçi dhe Safet Gjici kanë deklaruar se ata njiheshin më parë dhe kishin një lidhje intime prej kohësh, por kjo gjë lë dyshime duke nisur nga biseda e tyre tek video-skandali.
Safet Gjici arriti t’i fitonte zgjedhjet e 14 Majit me 1500 vota diferencë. Ai mori një mandat të dytë në krye të Bashkisë së Kukësit, pasi siguroi 49.34% të votave. Ndërkohë që kundërshtari i tij Admir Sinamati i koalicionit “Bashkë Fitojmë” mori 41.27% të votave.
Emri më i përfolur nga Partia Socialiste për të garuar në zgjedhjet e 24 shatorit është ai i Ali Hallaçit. Ky i fundit u lirua nga detyra e prefektit të Qarkut të Kukësit më 19 Korrik, ku qëllimi siç duket është garimi për kryebashkiak.
Emra të tjerë që përfliten nga PS janë edhe Albert Halilaj, ish-drejtor i drejtorisë së tatimeve në Kukës, apo edhe Granit Gjana, drejtuesi aktual i bashkisë, i emëruar nga Këshilli Bashkiak pasi mbante postin e nënkryetarit deri në momentin e shkarkimit të Safet Gicit.
Ndërkohë, nga opozita pritet të garojë sërish si kandidat mjeku Admir Sinamati. Tani opozita ka mundësinë që të rifitojë bashkinë që cilësohet si një bastion i Partisë Demokratike, por mund edhe të dështojë si në rastin “simotër” të Shukri Xhelilit në Dibër, ku edhe pas skandalit seksual të tij, sërish fitoi PS.
