Kryebashkiaku i Korçës, Sotiraq Filo, nga mania për të përfituar sa më shumë para, duket se ngatërron festën me koncertin. Të paktën, këtë gjë na lë të nënkuptohet nga çmimet që u ka vendosur biletave për hyrjen tek “Festa e Birrës”, e cila po bëhet nga viti në vit gjithnjë e më kushtueshme për qytetarët.
Hyrja për tek “Festa e Birrës” në Korçë ka qenë gjithnjë falas, siç mund të jetë një festë, por kjo gjë ka ndryshuar në dy vitet e fundit.
E teksa vitin e kaluar bëri vetëm natën e fundit me pagesë, këtë vit Filo ka bërë tre netë me pagesë, duke lënë, vetëm dy netë hyrjen falas dhe ndoshta vitin që vijnë, kështu siç e ka nisur, mund t’i bëjë të pestë netët me pagesë.
Por le të ndalemi pak tek çmimet e biletave.
Natën e parë, datë 16 gusht në skenë do të jenë: Lorenc Hasrama dhe Stivi Boka, Irkenc Hyka, Yll Limani. Në këtë natë hyrja është falas.
Natën e dytë, datë 17 Gusht do të performojnë në skenë: Last Call Band, Grupi NA, Eugent Bushpepa. Edhe në këtë natë hyrja është falas.
Natën e tretë, datë 18 Gusht do të performojnë në skenë: Seven Of, No Mercy, La Bouche, AD Disha. Në këtë natë, vetëm hyrja për një person është 20 euro ose 20 mijë lekë të vjetra.
Natën e katërt, datë 19 Gusht do të performojnë në skenë: -Les Aur Revoir, Elvana Gjata, Despina Vandi. Në këtë natë, çmimi i biletës është rritur duke shkuar në 30 euro ose 30 mijë lekë vetëm hyrja për një person.
Natën e pestë, datë 20 Gusht, Endri dhe Stefi Band, Keti Garbi dhe Dimitrios Choinas. Në këtë natë, vetëm hyrja për një person është 20 euro ose 20 mijë lekë të vjetra.
Pra, nëse një familje më katër anëtarë do të shkojë tek “Festa e Birrës” më datën 19 Gusht, duhet të paguajë 120 euro. Dhe në këtë çmim përfshihet vetëm hyrja, përveç atyre që mund të shpenzojë të tjera për ngrënie po pirje, që si çdo vit abuzohet me çmimin e qofteve apo birrave, duke i shitur me dyfishin e çmimit normal.
Pra, siç duket, kryebashkiakut Sotiraq FIlo, nuk i mjaftojnë lekët që merr nga bizneset që i paguajnë sërish çmime të larta për një stendë që ngrenë në shesh, duke u detyruar që të ngrenë çmimet e produkteve që tregtojnë, por kërkon të përfitojë dhe drejtpërdrejt nga xhepi i qytetarëve edhe me çmimet e biletave.
Çmimet e biletave për hyrjen me pagesë nuk janë pritur mirë nga qytetarët të cilët kanë “shpërthyer” në komente në rrjetet sociale, duke u shprehur se tashmë “Festa e Birrës” është kthyer në një biznes privat i Sotiraq Filos, duke vënë në dukje se ajo tashmë e ka humbur dhe kuptimin e saj, përderisa aty nuk tregtohet më birra e Korçës.
Po ashtu, ata vënë në dukje dhe numrin e ulët të këngëtarëve korçarë, teksa ka dhe nga ata që ironizojnë me faktin se pse nuk i bënë të pesta netët me pagesë, pasi Ylli Limani me Irkenc Hykën apo Eugent Bushpepën mund të ndihet më pak të vlerësuar se këngëtarët e tjerë.
Më poshtë, disa prej komenteve në rrjet:
