Një sherr me mjete të forta mes disa personave është regjistruar mbrëmjen e kësaj të shtune në një pikë karburanti në afërsi të Kryqëzimit të Tales, në aksin rrugor Lezhë – Milot
Autoritetet policore bëjnë me dije se pas një konflikti të çastit për motive të dobëta, janë përfshirë në konflikt fizik dhe me mjete të forta, shtetasi kosovar M. M. 37 vjeç me dy shtetas shqiptarë ( punonjës te karburanti) N. S. 61 vjeç banues në Lezhë dhe K. R. 52 vjeç, banues në Pllanë, Lezhë.
Shtetasi kosovar ka mbetur i plagosur pas dhunës nga punonjësit e karburantit dhe është dërguar në spital për ndihmë mjekësore i shoqëruar nga patrulla e policisë. Policia ka shoqëruar në ambientet e Komisariatit të Policisë Lezhë dhe dy punonjësit e karburantit shtetasit N. S. dhe K. R.
Gjithashtu, bëhet me dije se gjatë konfliktit, nga këta shtetas janë dëmtuar edhe ambientet e zyrës së qëndrimit të punonjësve të karburantit si dhe automjeti i shtetasit kosovar.
Grupi hetimor vazhdon veprimet hetimore për sqarimin e plotë të rrethanave të ngjarjes. Policia thekson se në përfundim të veprimeve dhe sqarimit të situatës, do të jepet një njoftim i dytë sqarues.
