Duke folur për operacionin e SPAK, “Metamorfoza”, ku u vunë në pranga emra të rëndësishëm nga bota e krimit, biznesit, policisë dhe drejtësisë, ish-deputeti Halit Valteri ka deklaruar se është marrë në pyetje nga oficerët e BKH-së në lidhje me atentatin e regjistruar më 1 nëntor të vitit 2019, tek mbikalimi i Shkozetit, në autostradën Durrës-Tiranë, ndaj ish prokurorit Arjan Ndoja ku mbeti i vrarë shoferi i tij Andi Maloku dhe u plagos Landi Muharremi, i njohur ndryshe si “Rrumi” i Shijakut.
Halit Valteri ka treguar se është marrë në pyetje nga BKH në lidhje me këtë atentat, pasi kishte dalë nga përgjimet se emrin e tij e përmendte grupi kriminal.
“Duhet të sqarojmë, ky nuk është një operacion i SPAK apo i Prokurorisë, ky është një sistem i përdorur gjerësisht nga grupet kriminale në të gjithë botën. Përgjithësisht nga ata që merren me trafikun e lëndëve narkotike, që sjellin kokainën ose mariuanën nga vendet latine drejt vendeve të Europës.
Grupet trafikante shqiptarë, kanë rënë në “rrjetën” e Inteligjencës franceze, ndërto janë disa letër-porosi që kanë vlerë për hetimet në Shqipëri, siç është banda e Durrësit ku u vra shoferi i prokurorit, Andi Maloku dhe atentati që iu bë “Rrumit” të Shijakut. Unë jam marrë në pyetje nga BKH për këtë ngjarje. Jam përmendur nga grupi kriminal ”, tha Halit Valteri në emisionin “Zona Zero”.
Kujtojmë se në lidhje me këtë atentat, pak ditë më parë gjykata dënoi me burgim të përjetshëm Redjan Rrajën, i cili sipas SPAK, ka qenë një nga ekzekutorë dhe me 35 vite burg edhe Arjol Halilajn, i cili sipas SPAK ka pasur rolin e ndihmësit për të larguar autorët nga vendi i ngjarjes. Nga hetimet rezultoi se organizatorët e këtij atentati ishin Plaurent Dervishaj, i cili ende është në arrati për shkak se ndodhet në Dubai, si dhe Ramazan Rraja, i arrestuar pak muaj më vonë. Ndërsa të dyshuarit e tjerë sipas SPAK ishin në rolin e bashkëpunëtorëve dhe ndihmësve.
