Policia e Tiranë ka arrestuar një hajdut dhe ka shpallur në kërkim bashkëpunëtorin e tij, të cilët dyshohet se kanë grabitur 14 banesa në kryeqytet me anë të çelësave të klonuar.
Në kuadër të operacionit “Smart keys” është vënë në pranga shtetasi Agron Goxhaj, 45 vjeç, banues në Tiranë, i cili ka qenë i dënuar më parë për veprën penale “Vrasje me paramendim”. Ndërkohë është shpallur në kërkim shtetasi Gëzim Kau, 48 vjeç, i cili po ashtu më herët ka qenë i dënuar për vrasje, në shtetin gjerman.
“Nga hetimet e kryera ka rezultuar se këta shtetas, në bashkëpunim me njëri-tjetrin, gjatë vitit të kaluar dhe këtij viti, me anë të çelësave të klonuar, kanë vjedhur shuma parash dhe sende me vlerë, në 14 banesa në zona të ndryshme të Tiranës. Në vijim të veprimeve, gjatë kontrollit të ushtruar në një subjekt në pronësi të bashkëshortes së shtetasit Agron Goxhaj, të cilin dy autorët e dyshuar e përdornin për të fshehur sendet e vjedhura dhe mjetet që përdornin gjatë vjedhjeve, u gjetënçelësa të ndryshëm, pajisje alumini që shërbejnë për veshjen e çelësave, dy aparate celulare, një bajonetë, një përforcues grushti, dhe veshje të ndryshme të përdorura gjatë vjedhjeve. Gjithashtu u sekuestruan dhe dy automjetet e autorëve të cilët i përdornin gjatë kësaj veprimtarie kriminale.” thuhet në njoftimin e bluve të kryeqytetit.
Policia njofton se vijon puna për kapjen e shtetasit Gëzim Kau, si dhe dokumentimin e rasteve të tjera të vjedhjes që mund të jenë kryer nga këta shtetas.
Materialet i kaluan Prokurorisë pranë Gjykatës së Rrethit Gjyqësor të Juridiksionit të Përgjithshëm Tiranë, për veprime të mëtejshme procedurale.
