Ish-kandidati i koalicionit “Bashkë Fitojmë” për bashkinë Kuçovë, Lefter Maliqi ka shkuar sot në SPAK.
Kjo nuk është hera e parë që Maliqi shkon në Prokurorinë e posaçme. Më herët, Lefter Maliqi ka depozituar disa denoncime kundër rivalit në garën e 14 majit, kryebashkiakut të Kuçovës, Kreshnik Hajdari.
Në shkresën e depozituar pak ditë më parë në SPAK, Maliqi e akuzon Hajdarin për korrupsion te funksionareve të lartë apo të zgjedhurve vendore.
Në denoncimin e tij Maliqi thotë se: “Në fshatin Frashër në Kuçovë, banorët në disa burime mediatike deklarojnë se për bërjen e një rruge të lagjes kanë paguar 15 mijë paund në bashki.
Rruga ekzistuese e ndërtuar që në periudhën e komunizmit është totalisht e shkatërruar, me gropa e rrëshqitje në disa vende dhe vështirësisht e kalueshme jo vetëm për mjetet por edhe për banorët.
Për këtë rrugë që nuk u bë kurrë janë paguar 15 mijë paund, rreth 20 milionë lekë në bashkinë e Kuçovës thotë një qytetar. Ne se dimë në çfarë zyre u dhanë lekët e fëmijëve, por ajo që dimë është që i çuan në bashki. Pas kësaj erdhën disa punëtore të një firme dhe vetëm gërmuan disa dhe the ikën”- pohojnë banorët.”
