Nga Boldnews.al
Shkollat shqiptare po braktisen dita-ditës, ku mijëra nxënës largohen çdo vit nga vendi. Problemet e sistemit arsimor, ato të shëndetësisë por edhe korrupsioni deri në palcë i administratës shtetërore, ka sjellë boshatisjen e Shqipërisë. Por, kjo s’e ka penguar ministrinë tonë të Arsimit të shpenzojë miliona euro për mësime dixhitale. Ose siç i quajnë vetë ata “mësime dixhitale” apo “mësime SMART”.
BoldNews.al ka raportuar në vijimësi për tenderat miliona euro të shpenzuara nga qeveria, para duket se janë hedhur “në kosh”. Kjo pasi e njëjta ministri po bën një tjetër tender të majmë pë “laboratorët SMART”. Po ku shkuan paratë apo pajisjet SMART? A kanë shkuar në shkolla, pasi çdo ditë nxënësit ankohen se s’kanë mjete apo laboratorë mësimore? Kush po bëhet i pasur nga këo tendera që vetëm sa shpenzohen paratë?!
Dokumenti i mësipërm është hapja e një procedure tenderuese të re për laboratorët SMART për shkollat në Shqipëri. Objekti i tenderit është “implementimi i laboratorëve SMART- për Ministrinë e Arsimit dhe Sportit”. Ndërsa kësaj herë institucioni që e ka bërë tenderin është Agjencia Kombëtare e Shoqërisë së Informacionit.
Por për sa para’? Nëse në të kaluarën janë bërë 2 tendera me vlerë rreth 7 milionë euro, kësaj herë shuma ka shkuar në plot 1.669.372.673 lekë të rinj. Ose e konvertuar në euro, në plot 16.6 milionë euro pasi kursi i këmbimit ka shkuar në 1 euro në 100 lekë. Pra, rreth 10 milionë euro më shumë sesa tenderët e kaluar. Por, lexoni pak se kur do të bëhet ky tender. Në dokumentin e mësipërm thuhet se tenderi do të zhvillohet në muajin gusht, pra në një muaj pushimi ku e gjithë vëmendja e njerëzve të thjeshtë do të jetë te pushimet vjetore. Por jo për zyrtarët, që në këtë kohë shpenzojnë pa fund.
Në muajin qershor të vitit 2022, redaksia e BoldNews.al denoncoi disa procedura të dyshimta të Ministrisë së Arsimit. Fillimisht janë shpenzuar 3.5 milionë euro për klasat dixhitale, por këto klasa edhe sot e kësaj dite nuk funksionojnë, pasi shkollat nuk kanë as laboratorë informatike. Investimet kanë qenë gjysmake. Disa kohë pas këtij projekti, qeveria ka akorduar të njëjtën shumë, kësaj herë për të blerë mini kompjutera.
Në atë kohë, BoldNews.al hulumtoi edhe dokumentet shoqëruese, teksa në to shkruhet se “…temat mësimore zhvillohen pa baza materiale të teknologjisë së informacionit, por vetëm me tekste shkollore dhe shpjegohen verbalisht nga mësuesit e shkollës ne shumicën e rasteve pa pasur mundësinë për një mësim më praktik”. Vërtetë?! Po, a nuk është investuar për vite me radhë për këto laboratorë?! Më tej ministria shkruante se pajisjet ekzistuese janë të vjetra dhe jo të përshtatshme për hapat e teknologjisë së informacionit në ditët e sotme. Megjithatë, edhe pas bërjes së tenderit të fundit, duket se të njëjtat fjali do të përdoren edhe në tenderët vijues!
