Gazetari Andi Bushati ironizoi rezultatin zgjedhor në Rrogozhinë, ku PS thelloi avantazhin edhe pse më 14 maj, rezultati ishte i ngushtë.
Pavarësisht skandaleve të shumta që kanë pasuar votimet, makineria elektorale e PS arriti një tjetër fitore.
“Nuk e di pse vazhdojnë i çojnë njerëzit në votime. Më mirë ta bëjnë si te PS, organizojnë një referendum që mos ketë më fare zgjedhje” shkruan gazetari Andi Bushati.
Kandidati i Partisë Socialiste, Edison Memolli fitoi zgjedhjet e përsëritura për bashkinë Rrogozhinë me 1702 vota më shumë se kandidati i koalicionit opozitar “Bashkë Fitojmë”, Shkëlqim Hoxha.
Sipas rezultatit final të publikuar të hënën në faqen e Komisionit Qendror të Zgjedhjeve, Memolla ka marrë 6658 vota ose 1538 vota më shumë se në 14 maj, ndërsa kundërshtari i tij Hoxha ka marrë 4906 vota, duke humbur 191 vota nga rezultati i 14 majit.
Në zgjedhjet e së dielës pjesëmarrja ishte më e lartë se në zgjedhjet e 14 majit, nga 32% ne 36%.
- Problematikat në zgjedhje:
Ditën e djeshme janë hasur problematika të shumta të tentativës së fotografimit të votës. Për shkak të kësaj problematike në qendrën e votimit 22-23, çoi edhe në ndërprerjen e procesit për disa minuta. Për këtë incident reagoi menjëherë edhe Kryekomisioneri Ilirjan Celibashi, i cili tha se shqetësim mbetet edhe votimi familjar.
“Fotografimi i votës përbën një shkelje të rëndë të ligjit penal, ka sanksione dënimi që shkojnë deri në 3 vjet. U bëj thirrje të gjithë votuesve që t’i shmangen çdo lloj joshje nga subjektet për t’u treguar atyre se për kë kanë votuar. Ata rrezikojnë shumë në këtë rast. Votimi familjar gjithashtu përbën shkelje. Ky është një problem, sa të kemi mundësi do ta adresojmë.”, tha Celibashi.
Gjatë gjithë ditës ka patur denoncime të shumta nga ana e opozitës për presion ndaj votuesve, manipulime të procesit zgjedhor, si dhe vënien e administratës në shërbim të Partisë Socialiste.
Gjatë pasdites, kreu i PD-së, Sali Berisha, publikoi në rrjetet sociale dhe një video ku një çift denonconin se si njerëz të kandidatit të PS-së, Edison Memolla i kishin kërcënuar se nëse nuk votonin në favor të kandidatit socialist, ata nuk do i linin me kaq.
- Problematika gjatë numërimit të votave
Në KZAZ-në nr. 43 pati disa problematike duke ndërprerë herë pas here numërimin. Shkak është bërë kontestimi nga kandidati i koalicionit “Bashkë Fitojmë”, Shkëlqim Hoxha i cili tha se gjatë numërimit të votave ka identifikuar shenja në fletët e votimit të hedhura për kandidatin socialist, Edison Memolla.
Kjo ka shkaktuar debate mes Hoxhës dhe deputetit të PS-së, Etjen Xhafaj i cili ishte i pranishëm në proces.
Shkëlqim Hoxha kërkoi ndërprerjen e plotë të procesit dhe rinisjen e tij paraditen e sotme, kërkesë e cila pas konsultimeve me KQZ-në nuk u pranua nga anëtarët e KZAZ-së.
