Ka marrë fund arratia e një shtetasi shqiptar të shpallur në kërkim nga drejtësia spanjolle.
Në pranga ka rënë shtetasi Vienis Haskaj, 33-vjeç, i akuzuar si pjesëtar i një grupi kriminal në fushën e kultivimit dhe prodhimit të kanabisit, që operonte në Spanjë.
Mësohet se Gjykata e Castellon Spanjë, ka caktuar ndaj Haskajt masën e sigurisë “Arrest me burg”, për veprat penale “Trafik droge”, “Organizatë kriminale” dhe “Vjedhje e energjisë elektrike”.
Raportohet se 33-vjeçari përdorte dhe dy mbiemra të tjerë, Hoxhaj dhe Jazaj.
“Strukturat e hetimit të krimeve dhe ato operacionale në DVP Vlore në bashkëpunim me njësinë FAST Albania në Drejtorinë e Përgjithëshme të Policisë së Shtetit, në kuadër të operacionit policor të koduar “Castellon”, bënë të mundur kapjen dhe arrestimin provizor me qëllim ekstradimin drejt Spanjës të shtetasit :
-V. H, alias V. H, alias V. J, 33 vjec, banues në lagjen “Kushtrimi”, Vlorë.
Arrestimi provizor i këtij shtetasi u bë pasi Gjykata e Castellon Spanjë, më datë 06.07.2023, ka caktuar masën e sigurisë “Arrest me burg”, për veprat penale “Trafik droge”, “Organizatë kriminale” dhe “Vjedhje e energjisë elektrike”, të parashikuar nga Kodi Penal i Spanjës. Ky shtetas në bashkëpunim me shtetas të tjerë shqiptarë e spanjollë, merrnin shtëpi me qera në zonën e Castellonit dhe i përshtasnin për të kultivuar bimë narkotike me anë të llambave”,- njofton policia.
Interpol Tirana vijon procedurat ligjore për ekstradimin e tij drejt Spanjës.
